05 Nov 2018 12:12

inkhel

​Paris Masters champion Khachanov

Paris Masters khelh zawh a ni leh ta a, world no.1 thar Novak Djokovic leh Russian player kum 22 mi Karen Khachanov-te inhmachhawnin, darkar khat leh minute 37 chhungin Khachanov hian Serbian tennis player ropui Djokovic hi a hneh.

Djokovic hi a zawnin game 22 a chak zawn mek a, semi final-ah Roger Federer hnehin beiseina sang tak nen Paris Masters final lut mahse kum 22 mi  Khachanov hian 7-5, 6-4 in a lo hneh. Khachanov hian final thleng tur hian semi final-ah Dominic Thiem a hneh ve thung.

Khachanov chuan Paris Masters-a champion chungchang sawiin, “Ka tan chuan a hlu em em a, ka career-a title lak tawh zawng zawnga hlu ber a la ni bawk. Hetianga season ka khar thei hi ka lawm em em a, khawvela pakhatna Djokovic ka hneh avang pawh hian ka lawm em em a ni,” a ti.

Paris Masters-a a champion avangin Khachanov hi world no.18 atangin world no.11-ah a kai chhova, kum 2009-a Nikolay Davydenko hnuah Russian mi Master 1000 title la leh thei hmasa ber a ni.

Kum 31 mi Djokovic hi kar tluanin a nuamsam lova, mahse Khachanov chu a lawmpui thu sawiin, “Kan inkhelh khan nidang angin ka damsam lova,mahse Karen hi ka zah a, game ropui tak a khel a chak ngei kha a phu takzet. Trophy lak kha a phu a, nakin zelah Karen atang hian match ropui tak tak kan la hmuh ngei ka beisei a ni,” a ti.