04 Nov 2018 03:03

inkhel

​Paris Masters-ah Federer aiin Djokovic a chungnung

Paris Masters semi final-ah world no.1 ni mai tur Novak Djokovic chuan Roger Federer chu 7-6 (8-6), 5-7, 7-6 (7-3) in a hneh a, final a lut.

Tennis player ropui pahnihte hi an vawi 47 inhmachhawnna niin, Djokovic hian hnehna changin final-ah Dominic Thiem hnehtu Karen Khachanov a hmachhawn ang.

Djokovic hi semi final khelh zawhah Sky Sports chuan kawmin, “Game ropui tak a ni a, kan inhnehtawk hle. Kan lo intum fo tawh a, mahse tun tum hi a la ropui berin ka hria. Wimbledon semi final-a Nadal nen kan inhmachhawn nen khan tun season-ah chuan a la ropui ber awm e,” a ti.

Kum 31 mi Djokovic hi a zawnin game 22 a chak tawh a, thawhtanni hian world no.1 thar a ni dawn. Swiss third seed Federer hian title 100 lak nan pakhat chiah bak tawhin, a la nghah leh deuh rih a ngai dawn.

Kum 37 mi Federer chuan, “Novak hi a kal tluang em em a, mahse ka game-ah khan ka lungawi a, Basel-a ka khelh aiin ka khel tha zawk. Basel-ah khan ka champion a, hetah hi chuan Novak anga tha kha min hneh tur chuan an awm a ngai a ni. A tennis khel hi a hmuhnawm em em a, a ball vuak pawh a mawi thei hle. Ka tawnhriat neih tawh ka hman tangkai a ngai a, tun aia thaa ka khelh chhoh leh theih ngei pawh ka beisei a ni,” a ti.