Argentina chuan Copa America Semi final-ah 6-1 laiin quarter final-a Brazil pet chhuaktu Paraguay an sawp a, July ni 5, 2015 zing dar 1:30-ah a thlengtu Chile leh Argentina te chuan Santiago-ah final an khel dawn ta a ni.
Argentina 6-1 Paraguay
(Rojo 15', Pastore 27', Di María 47', 53', Agüero 80', Higuaín 83') (Barrios Caceres 43')
Argentina XI: Romero; Zabaleta, Demichelis, Otamendi, Rojo, Biglia, Mascherano, Pastore, Messi, AgUero, Di María.
Paraguay XI: Villlar, B Valdez, Da Silva, Aguilar, Piris, Gonzalez, Caceres, Ortiz, Bentiez, Santa Cruz, N H Valdez.
Referee: Sandro Ricci (Brazil)
Goal a lut hnem kher mai, Argentina captain Lionel Messi chu goal khungtu zingah tel ve lo mahse goal thum a siam sak bakah goal dangahte pawh a inrawlh hlawm a, Argentina game innghahna a ni chiang kher mai. Goal hmasa ber hi 15 mins-a lut a ni a.
Di Maria free kick hlawh chhuah atangin Man Utd defender Rojo chuan goal a khung. Messi free kick pet tha zet chu box chhunga awm Rojo chuan lo dawngin, lei hrulah chiang takin a pet goal a, si khat faiin Argentina chuan hma an hruai.
Goal hnihna hi minute 30 an khelh tlin tepa lut a ni a, Messi an ven lutukna lamah Pastore an lo thlahthlam, Messi chuan Pastore tan ball tha tak a pe a, a ni hian chiang set sawtin Paraguay goal-ah a chhuih lut ve leh ta mai, si hnih faiin Argentina chuan hma an hruai.
Argentina hian game thunun em em mahse 43rd mins-ah Paraguay tan Lucas Barrios chuan goal a khung ve tlat mai, hei hian inkhel a ti nung thar leh ta a, Bruno Valdez tauh per tha zet chu Lucas Barrios chuan box pawn atangin kawh takin veilam sirah a pet goal. First half a tawp chhunzawm a, 2-1 in Argentina chuan hma an hruai.
Second half-ah game nung tak kan hmu dawn emaw kan tih laiin Argentina chuan goal an khung chho ta mawlh mawlh a, 47th mins-ah Pastore through ball tha tak chu Di Maria chuan goal khung nan a hmanga, 53rd mins-ah Di Maria chuan Messi leh Pastore thawh rah telin goal hnihna a khung leh.
Messi ball pek tha zet chu Pastore chuan shot-in, Paraguay goalkeeper Villar chuan a lo dang a, hemi per hi Di Maria chuan a pet goal chhunzawm ta a ni. Argentina hian an la duhtawk mai lo, hun tawp dawn lamah goal hnih dang an khung leh a, Sergio Agüero chuan lakchhuah a nih hma chiahin Di Maria ball cross tha zet chu a tauh goal.
Sergio Agüero chu lakchhuah niin Higuain a rawn lut a, Higuain hian goal a khung chhunzawm nghal zat mai. Messi through ball tha zet chu Higuain hian a pet goal chhunzawm a, tichuan 6-1 laiin Argentina chuan hnehna an chang ta a ni.
Group match-ah Argentina leh Paraguay te hi 2-2 in June ni 13 khan an lo inhnehtawk tawh a, vawiinah erawh an sawp hle mai. 1993 hnua Copa America champion nih theihna chance tha tak Argentina chuan an nei mek a, 2007 hnua Final an luh lehna hmasa ber a ni nghe nghe. Brazil-in quarter final-a an ngam loh heti taka Argentina-in an sawp takah chuan mi tam berte chuan champion turin an ring hle, chutih laiin a thlengtu Chile hi team khauh tak an ni a, final hmuhnawm tak kan en ngei dawn e.
Argentina Copa America final kalkawng
Group match - 13 June: 2-2 v Paraguay
Group match - 17 June: 1-0 v Uruguay
Group match - 20 June: 1-0 v Jamaica
Quarter-final - 27 June: 0-0 (5-4 on pens) v Colombia
Semi-final - 1 July: 6-1 v Paraguay