15 Nov 2018 04:50

inkhel

Panganaah LeBron James a chho

LeBron James chuan Los Angeles Lakers chu Portland Trailblazers lakah a chakpui a, NBA khawvela point score hnem zingah pangana a ni ta a. James hian Wilt Chamberlain lehpelin panganaah hian a awm ta chiah a ni.

Kum 33-a upa LeBron James chuan fourth quarter tawp lamah free throw a lut a, he inkhelah hian point 44 a thun tling chiah a, NBA a luhchilh hnuah point 31,425 a thun tling ta bawk a. Point 31,419 thuna panganaa awm thin Wilt Chamberlain chu a lehpel ta a, Los Angeles Lakers chu Portland Trailblazers lakah 126-117 in a chakpui zui a ni.

Los Angeles Lakers leh Philadelphia 76ers legend Wilt Chamberlain hi kum 14 chhung a inkhelh lai khan Most Valuable Player atan vawi 4 an thlang a, 1967 leh 1972 inkar khan NBA championship title pahnih a la bawk a. NBA game-a point 100 score tling thei awm chhun a la ni mek bawk.

James-a’n Lakers leh Trailblazers inkhela point 44 a thun hi tun season chhunga game khata a thun hnem ber a la ni a, hei bakah hian April 2016 a Kobe Bryant-a’n point 60 a thun hnua Lakers player in point an thun tam ber tum a ni bawk.

“Basketball player ropui tak takte nen ka hming an han sawi pawlh thin hi chu a nuam ka tih rualin ka chawr chhuahna kan khua hi ka rilruah a rawn lang hmasa ber zel a. Ka bul tanna ka ngaihtuah hian thleng thui ve tak chu ka ni tawhin ka hria,” tiin James chuan a sawi.

July thla khan free agent James hian kum 4 chhung atan Los Angeles Lakers chu a zawm a, contract hi $154 million (£116 million) man hu vel zet a ziak a. Kum 15 chhung basketball khawvela a chen chhungin MVP vawi 4 a nih tawh bakah NBA title vawi 3 a la tawh a, Miami Heat chu vawi hnih a champion pui a, Cleveland Cavaliers chu vawi khat a champion pui bawk a ni.

LeBron James chuan, “Chamberlain kha NBA khawvelah chuan player ropui ber pawl a ni a, Shaquille O’Neal nen khan an chungnung hle a. Lakers player awm tawh zingah chuan a ropui berte zinga mi a ni chiang a, scorer leh rebounder tha chungchuang a ni a, basketball mai ni lo, ni tin nunah pawh mi chung en a ni hrim hrim,” a ti.