Mizoram Powerlifting Association (MPA) leh ZONET Cable TV Pvt Ltd tangkawp chuan kum 8 hnuah a vawikhatnan Mizo Pachak ber a thlang chhuak leh dawn a, thla thar March ni 1, 2019-ah Preliminary Round tan tura ruahmanna siam a ni.

Pachak zawnnaa tel turte in register hun chhung hi February ni 25 thleng hawn a ni a; Zonet Office, Zarkawt-ah hming ziah luh tur a ni. Hawla Indoor Stadium kawt, Republic Vengthlang-ah Pachak ber hi thlan chhuah tum a ni a, Zonet TV chuan Live in a pe chhuak thin dawn a ni.

MPA leh Zonet tangkawp chuan kum 2011 khan Mizo Pachak ber a lo thlang chhuak tawh a, Mizo tlangvalte an chak a ni tih hmuh chhuah na turin - tehfung hrang hrang hmangin mi sawmhnih rual zet an inel a, kawng chanvea inelna tawpsan an awm nawk bawk.

A changin rit an chawi a, a changin an nawr a, a changin an pawt bawk thin. An tawrhchhel leh chhel loh hriat nan te, tha an pek rei theih leh theih loh hriatnan te inelna chi hrang hrang hautak fe fe an paltlang a ni.

Kum 2011 a Mizoram Pachak ber zawnnaah khan P. Lalchamliana, Lunglei chu 1-na niin, Zosangliana, Ramthar Veng chu 2-na a ni a, Zomuansanga, Bawngkawn chu 3-na a ni.

Kuminah hian sponsor thar leh inelna thar, kalphung felfai zawk nen Mizo Pachak ber thlan chhuah leh tum a ni a. Organiser ten ruahmanna felfai tak an siam tawh a, chutihlaiin registration hun hawn mek a ni.

(adsbygoogle = window.adsbygoogle || []).push({});