Paige VanZant chuan UFC lama a hun tawp a hmang chho tan niin a ang a, WWE lama a luh an ring chho hle.

UFC fighter thenkhat chu MMA atangin WWE lamah hian an lo insawn tawh a, heng zingah hian Ronda Rousey chu a hlawhtling ber pawl a tih theih a. Shayna Baszler pawh a che fuh viau a, anni bakah hian hmeichhe fighter dang pakhat an sawi ri ve leh mek a ni.

Tuna hmeichhe UFC fighter zingah chuan Paige VanZant chu a lar berte zinga mi a ni a, chutih rualin a contract a hman zawh dawn hnaih tawh avangin MMA huang hi a chhuahsan mai an ring tawh a ni.

WWE presenter Renee Young chuan tun hnaiah khan Paige VanZant chungchang hi Twitter lamah a sawi chhuak zeuh a, UFC atanga chawlin WWE lama insawn thei tur angin a sawi thawi a, hei hian ngaihven pawh a hlawh hle.

UFC 251 ah khan Paige VanZant chu a inlan a, flyweight huangah Amanda Ribas nen an insual a. First round chiah an khel hman a, Amanda Ribas chuan Paige VanZant chu submission hmangin a hneh nghal der a ni.

VanZant hian a contract chu a hmang zo a ni ta mai a, UFC 251 thleng chauh kha thuthlung ziah sa a nei tawh a. A awm zel dan tur engmah sawi chhuah a la nei lo a, thil a la chiang lo vel vek a ni.

Dave Meltzer pawhin Twitter lamah WWE in Paige VanZant chu kum eng emaw zat kal taah khan an lo be tawh tih a sawi a, SummerSlam PPV a tel turin an bia nia sawiin, hetih hun lai hian UFC chuan VanZant chu insual tura an duh lai tak a nih avangin an inrem ta lo niin a sawi a. VanZant chuan WWE huanga luh chu hemi tum pawh hian a duh niin a sawi.

Hmanni deuhah khan Paige VanZant chuan insual aiin in lam atangin pawisa a hlawh hnem thei zawk tih a sawi a. Ina awm pahin Instagram-ah thlalak a vawrh chhuak a, hetiang hmang hian pawisa a hlawh chhuak nual a. A hlawh chu tihsan a phut a, Dana White chuan a tihhlawhtlinsak ta rih lo a ni.

A chak loh hnuah VanZant chuan a awm zui dan tur engmah sawi a la nei lo a, a contract a hman zawh tak avangin tunah chuan free agent a ni mek a. Bellator lamah pawh a lut lo ang tih sawi theih a ni lo a, WWE lama kal chu a tan thil tih chi tak a nih a rinawm a ni.