Atletico Madrid chuan Estadio Wanda Metropolitano ah Real Madrid an mikhual a, Madrid Derby-ah hian Real chu 3-1 in an chak a, La Liga-ah pahnihnaah an chhoh theih phah a ni.

Diego Simeone pawl, Atletico Madrid chuan kar hmasa khan Real Betis an hneh lo a, nikum September 1 hnua a vawi khatna atan point an hmu lo a. La Liga hmahruaitu Barcelona nen an inkar tihzim theihna hun tha an neih chu an bawhpelh a, Barca hi Valencia nen inhnehtawk mahse point 6 in hma an hruai theih phah a ni.

Real Madrid hi tun hnaiah an che tha chho viau a, an game hnuhnung parukah vawi nga an chak a, vawi khat chu an khingpuite nen an inhnehtawk a. Santiago Solari pawlte hian kar laihawlah Barcelona chu an kulhpui Camp Nou-ah 1-1 in an va draw a, Copa del Rey ah beiseina an la tinung zel a. La Liga lamah rilru an pe leh chiah a, Madrid Derby an khel zui leh nghal a ni.

Atletico leh Real te hi La Liga match an khelh hnuhnun vawi li ah an inhnehtawk vek a, a zawna an inhnehtawk rei ber tum a ni a. Atletico hian ni ruk kalta khan Betis an hneh lo a, khami tuma khel kha an thlak danglam nual a. Diego Godin chu tlar hnungah a ding ve leh tawh a, Juanfran chu a thlak a ni.

Atletico Madrid XI (4-4-2): Jan Oblak; Santiago Arias, Jose Gimenez, Diego Godin (c), Lucas Hernandez; Angel Correa, Saul Niguez, Thomas Partey, Thomas Lemar; Alvaro Morata, Antoine Griezmann

Subs: Vitolo, Rodrigo, Antonio Adan, Juanfran, Victor Mollejo, Filipe Luis, Nikola Kalinic

Real Madrid XI (4-3-3): Thibaut Courtois; Dani Carvajal, Raphael Varane, Sergio Ramos (c), Sergio Reguilon; Luka Modric, Casemiro, Toni Kroos; Lucas Vazquez, Karim Benzema, Vinicius Junior

Subs: Nacho, Keylor Navas, Marcelo, Mariano Diaz, Gareth Bale, Marco Asensio, Dani Ceballos

Inkhel an tan a, derby a ni bawk a, boruak pawh a tir atangin a tang nghal viau mai a, heti chung hian a tir lamah goal shot a awm mai lo thung a. Minute 10 an khelh tlin hnuah goal shot a awm ve tan chiah a ni.

Minute 16-ah Real Madrid chuan corner an hlawh a, Sergio Ramos chuan ball a pet phei a, heta ball kal hi Casemiro chuan overhead kick hmangin Atletico goal-ah chuan a lo thun a, Real Madrid chuan 1-0 in hma an hruai theih phah a ni.

Rei pawh an khel zui hman lo, goal a lut leh a, tun tum chu Atletico Madrid lam thun a ni ve thung a. Minute 25-ah Angel Correa chuan Antoine Griezmann chu ball a pe a, France striker Griezmann hian Real goal-ah chuan thunin an si phurh chu a sut ve leh a ni.

Antoine Griezmann hi Atletico Madrid tana a khelh chhungin La Liga goal 120 ah a inhnamhnawih tawh a, game 166 khelhah goal 90 thunin, mi goal thun tur vawi 30 a siamsak tawh a ni.

Half time a hnai tan a, minute 41-ah Real Madrid chuan penalty an hlawh a. Jose Gimenez chuan Vinicius Junior chu a lo titlu a, an inbahna tak hi chu box pawn chiah ni mahse Vinicius hi box chhungah a tlu lut a, referee Javier Estrada Fernandez chuan VAR hmanga a en fiah hnuah penalty hi a pe tlang a, sawisel a hlawh hle.

Sergio Ramos chu pen chhuakin penalty hmang hian Real chu 2-1 in hma a hruaipui a ni. Ramos hian tun season chhungin goal 11 ngawt mai a thun tawh a, season khat chhunga a thun hnem ber tum a la ni.

Goal dang a luh belh tawh rih lo a, half time a thlen chuan mikhual team Real Madrid chuan 2-1 in hma an hruai a, Atletico Madrid hi an chak lo a nih chuan tun season chhungin anmahni khelmuala an tlawm hmasak ber a ni ang.

Second half an khel tan leh a, an innawr chhunzawm leh nghal vat a. Minute 54-ah Alvaro Morata chuan a club hlui lamah hian goal a thun a, mahse VAR hmanga an en let leh chuan a offside a ni tih a hriat theih a, hei vang hian referee chuan a pawm ta lo a ni.

Minute 74-ah Tottenham player hlui pahnih zarah Real Madrid chuan goal an thun belh leh a. Luka Modric chuan Gareth Bale chu ball tha zet mai a pe a, Bale hian Atletico goal-ah chuan a lo thun a, 3-1 in hma an hruai a ni.

Hun a tawp a, Real Madrid chu 3-1 in an chak a, La Liga-ah Atletico hi lehpelin pahnihna an ni leh thei ta chiah a. Atletico Madrid hian anmahni khelmualah November 2016 hnuah goal thum an chhuah leh hmasak ber niin, an chhuah hnuhnun ber pawh Real Madrid nen an inkhelh thoin a ni.