Manchester City manager Pep Guardiola chuan Premier League-a pahnihna nih chu FA Cup emaw League Cup emaw chawi aia a that zawk thu a sawi.

City hian champion lai niin tun Premier League season hi khel mahse, an title an humhim zo lova, Liverpool chu an champion fel tawh.

City hi League Cup-ah an champion tawha, FA Cup-ah champion thei an la ni bawka, mahse Premier League-a pahnihnaa awm chu City hian an ngai pawimawh zawk niin a lang.

Pep Guardiola chuan, “Kan organisation hian title lak kan duh a, kan title kan humhim zawh tawh loh avangin a lawmawm lem loh hle a, mahse kan elpui ber te hi tun season-ah an tha em em a, an level-ah kan awm thei lo.

“FA Cup-a champion aiin pahnihnaa awm hi a tha zawk tih chu phat rual a ni lova, Champions League khelh phak hi club tinte tum a nih avangin pahnihnaa awm hi Carabao Cup ai pawhin a tha zawk. Team tha ber kan ni lova, keini aia team tha zawk an awma, mahse team 18 dang te aiin kan tha zawka, pahnihnaa awm hi season khar kan tum dan a ni,” a ti.