Season liamta khan Premier League-ah Manchester City leh Liverpool an tha fal hle a, an pahnih hian season tluan deuh thawin an inuma, a tawpah City hi point khatin an champion.

Liverpool manager Jurgen Klopp chuan season hmasa angin tun season-ah team hnih chiah an intum tawh dawn lo tih a sawi. Klopp chuan, “A pawimawh ber chu tun season hian team hnih chiah kan inum tawh lo a ni.

“Team hnih chiah an inum leh a nih pawhin, pahnih zingah chuan kan tel dawn em a hriat loh. Theihtawp kan chhuah leh a ngai dawn a, season hmasa a kan chet that ang kha kan vawi khat chet thatna a ni a, season tinin khati ang khan kan che tha dawn em tih eng mah a hriat lova, hmasawnna tur tam tak kan la nei a ni,” a ti.

Klopp hian an player Alex Oxlade-Chamberlain-a’n contract thar a ziak chu a lawm tih a sawi telin, “Chamberlain-a’n kan hnena a contract a pawtsei hi ka lawm hle a, kan hnena rinawm a thlang hi a lawmawm hle.

“A inhliam lai pawh khan Chamberlain-a chungchang hi kan sawi fova, a chhan chu player tha tak a nih vang a ni. Tunah a hliam a damin a rawn kir tawh a, khel thei reng a ni a, kan tan chu chu a tha hle a ni,” a ti bawk a ni.