Conor McGregor chuan boxing ring luh chilh leh a tum thu sawiin, Manny Pacquiao nen inhnek thei turin hma an la mek niin a sawi.

Irish fighter Conor McGregor hian Las Vegas khawpuia UFC 246 ah Donald ‘Cowboy’ Cerrone a hmachhawn dawn a. Hmabak hnaivai tak nei mah se a hnua a awm zui zel dan tur a ngaihtuah tel nghal a ni.

McGregor hi August 2017 ah khan boxing ring chhungah a inlan a, Floyd Mayweather nen an inhnek a. Las Vegas khawpuia an inhnekah khan round 10-naah Mayweather chuan McGregor chu TKO in a hneh a. A chak lo zawk ni chung hian hneh loh nei lo Mayweather hmaa a chet danah McGregor chuan fak a hlawh hle.

Kum 31-a upa McGregor chuan, “Tunah hian Manny Pacquiao nen kan inhnek theihna turin hma kan la mek a. Thil tih puitlin atana ka duh deuh ber chu tunah tak chuan boxing world title lak theih hi a ni,” a ti.

“Boxing world title lak theih chu ka tan thil ropui tak a ni ngei dawn a, chutiang chu a taka la thlentir theih ngei ka tum hle a. Engtikah emaw tak chuan title chu lak theih ngei ka duh dawn a ni,” a ti bawk.

A sawi zelnaah, “Floyd Mayweather nen hian inhnek leh theih ka duh khawp mai a. Kan inhnek tum khan ka che tha ve hlein ka hria a, ka hmaa ding kha tumahin an la hneh theih loh a ni a, chuti chung chuan tha takin ka hmachhawn ve thei a ni,” a ti.

“Tlemin insiam rem ila, ka khelh dan thlak danglam nual bawk ila, kha ai khan ka la chet that theih lehzual ka ring a. Chutiang chuan ti ngat ila, a chak zawk ka nih theih hi ka ring tlat a ni,” a ti.