Las Vegas-a khawvel nghahhlelh boxing match ropui takah unanimous decision-in Floyd Mayweather chuan Many Pacquiao a hneh. Kum 38 mi Mayweather hian defensive game ropui tak nen a khingpui Manny hi a hneh a, Floyd hian a career-ah mi 48 hmachhawn tawhin hengah hian hnehna a la chang vek a ni.
Las Vegas-a MGM Grand-ah hian pay-per-view lamah harsatna tlem an tawh avangin an inhnek hi tun hun tlemin an sawn tlai hret a, India ramah chuan chawhma dar 9:27-ah an inhnek tan. A tir atanga a tawp thlengin Pacman hian a um a, mahse Mayweather chuan thiam taka lo dawngsawngin, a pawimawh ber point a hlawh chhuak kauh kauh a, Mayweather hian vawi 435 a hnek chhuah atangin Pacman hi vawi 148 a hnek fuh a, Pacquaio hian vawi 429 hnekchhuakin, vawi 81 Floyd hi a hnek fuh a ni.
Judge pathumte chuan 118-110, 116-112 leh 116-112 an pe a, unanimous hmangin Floyd hian hnehna a chang ta a ni. Mayweather hian WBC leh WBA title te a kawl bakah WBO Walterweight title a la ta bawk a, tunlai boxer ropui ber niin Mayweather hian a inchhal chhunzawm ta bawk a ni.
Kum 19 chhung zet boxing a khelh chhungin professional fight vawi 48 a nei a, heng a hmachhawnte hi a la hneh vek a. Mayweather hian kumin September thla hian inhnek vawi khat a hmachhawn leh anga, chumi hnuah boxing chawlhsan a tum thu a puang nghal a. Tunge a hnek dawn tih erawh sawi chian la awm lo mahse Amir Khan a hmachhawn an ring fur mai.
Kum 36 mi Pacquiao hian he match-ah hian tan tu a ngah zawk a, Las Vegas-a a hmuna fight en mipui 16,507 zinga a tam zawk chuan Pacman hi an support tih a chiang. Mayweather hian hnehna a chang mahse mipui chuan an duh loh zia lantirin a boo hluah hluah a ni. Pacman hian a career-ah hnehna vawi 57 changin chak loh erawh vawi 7 a nei a, draw vawi hnih a nei bawk a ni.
Engzat nge an hlawh dawn chiah sawi fak theih la ni lo mahse he inhnek atanga sum tlingkhawm hi $400m vel ni tura ngaih a ni a, Floyd hi a chak emaw chak lo emaw 60% a chang dawn hrim hrim a, Pacman hian 40% a chang dawn a ni. Hemite inhnek hi khawvela inhnek pawisa tamna ber a ni chiang hle. A hmuna inhnek en zingah hian milar an tam hle a, TV atanga kan hmuh theih zingah Clint Eastwood, Robert De Niro, Sting, Prince, Paris Hilton leh US Tycoon Donald Trump te an langsar hle.
Manny chuan a tum anga a khelh theih loh chhan chu Mayweather tlanchhiat vang niin a sawi a,"Ka chak turah ka ngai a, engmah tih a nei ve lo. A tlanchhe kual mai mai a ni." tiin a sawi. Pacman hian Boxing a la khel chhunzawm zel dawn nge dawn lo a la sawi thei lova, chawlh a hman phawt tur thu a sawi a ni.
Floyd Mayweather chuan , "Ka chak vang hian Pathian hnenah lawmthu ka sawi duh a, helai hmuna lokal fans-te leh khawvel hmun hrang hrangah lo thlirtute chungah pawh."
"Min nawr zawk dawn tih kha ka hre sa a, min nawr ta ngei a mahse ka chingfel thei. Kan tih tur tak zaninah hian kan ti a ka lawm tak meuh meuh."
"Manny kha chiang takin ka zir a, tumpui hautak tak chu a ni. Ka pa chuan nawr ve deuh turin min ngen a mahse ka hun thlen hun nghah ka ngai a Manny kha uluk taka en reng a tul."
"Ka inhnek hnuhnung ber tur chu September thla hian a ni dawn a, hemi hnuah hi chuan Glove ka khai ve tawh ang." tiin a sawi.
inkhel.com ngaihdan :
Offensive fighter chu Pacman kha a ni chiang mai. Mahse Mayweather khan a ban sei leh a taksa len hmang tangkaiin defensive game ropui tak a khel. Pacman khan nawr hle mahse Floyd tactic a tha a, a duhthusam point a hlawh chhuak ta tho.
Floyd-a game erawh kan ngaina lem lo, ring kha chu awmlo selang chuan KM 1 dawn lai a tlanchhia ang tih velin a tlanchhe nasa, mahse Pacman khan tihngaihna vak a hre lo. Punch chu nei hnem mahse point hlawhchhuak turin Judge te a hmin zo lo a ni ber mai.
Pacman-a game a hmuhnawm, Floyd game erawh a boring. Mahse kum 20 hnuah a record an han en anga, vawi 48 a hnek tawhah vawi 48 a chak an han tih chuan tuman Pacman nen an inhnek tum khan a tlanchhe nasa an ti tawh dawn si lo va. Technique leh tactic-ah Mayweather a chungnung zawk a ni e.
Hetih lai hian defensive fighter an awm chhung hi chuan boxing hi a boring chho zel dawn tihna a ni ber mai. Football-ah pawh defensive game khel thin chu hmuhnawm loh kan ti a nih kha. Boxing hian a ropuina a hloh chho mai ang tih a hlauhawm hle mai.
Photos : Getty Images