Amir Khan chuan a hming lamtu Manny Pacquiao nen inhmachhawn chu a hnial loh thu a sawi.

Hmanni lawkah weight category pariata world champion ni thei Manny Pacquiao chuan kumin chhungin Amir Khan nen inhnek a duh thu a sawi a, hei hi Amir Khan chuan a chhang let a. Hun rei tak a hmelhriat tha lo ni tawh Pacman chu hmachhawn a duh thu a sawi a ni.

British boxer Amir Khan chuan Lucas Matthysse knock-out a WBA welterweight title latu Pacman chu hneh dan a hriat thu a sawi a. Unified world light-welterweight champion hlui Khan chuan Pacquiao nen chuan an la inhnek ngei a rin thu a sawi bawk.

Kum 31-a upa Khan chuan, “He pa nen hian kan la inhnek dawn tih hi ka sawi ve ziah a, a takah a thleng thei der si lo a. Dik tak chuan ka hmaah hian tu pawh awm se pawi ka ti lo a. Ka hmaa ding tur hi Manny Pacquiao a nih leh Manny Pacquiao chu ka hmachhawn mai dawn a. A nih loh tak leh fighter dang tha tak tak an la tam mai,” a ti.

Kum 39-a upa Pacquiao hmachhawn theih ngei chu a duhthusam a nih thu sawiin, an pahniha an inhnek thei dawn a nih ngat chuan boxing khawvelah chuan pawisa tamna pawl tak a nih a rin thu a sawi.

“Kan pahniha kan inhnek thei a nih ngat chuan pawisa chu a tlem hauh lo ang tih a chiang a, engkim mai hi Manny Pacquiao team te chungah a innghat a. Kei chu ka inpeih nghal a, anni lam hian an remtih ve phawt a ngai a ni,” a ti.

Boxing Hall of Famer Freddie Roach hnuaia Wirld Card Gym-ah Amir Khan leh Manny Pacquiao te hi an lo inkawp reng tawh a, an inhmelhriat tha hle.

Amir Khan chuan, “Manny Pacquiao hi fighter ropui deuh mai a ni a, kum tam tak chu kan train dun tawh a. Mahse, a chang chuan thian dun pawh kan inbeih a ngaih chang a awm a, ring chhungah chuan thian kan nihna lantir a rem dawn lo,” a ti a.

“Kan inhmachhawn a nih ngat chuan inhnek hmuhnawm tak en tur a awm ngei dawn a. Pacman hi ka zah a, pa tha tak a ni a. Infiamna khawvelah thil ropui tak tak a ti teuh tawh a, khatiang vang khan ka ngaisang hle bawk a. Ngaisangin zah hle mah ila ka hneh thei a ni tih ka hre chiang hle,” a ti bawk.