23 Feb 2019 03:41

inkhel

Pacman-a’n a fapa boxing khelh a remti lo

Manny Pacquiao chuan boxing khawvelah chanchin duhawm tak tak a hnutchhiah teuh mai a, boxer ropui berte zingah an sawi tel phah a. Hetih lai hian a fapa chu boxer ni ve tura a duh loh thu a sawi.

Khawvel hmun hrang hrangah mi tam takin Manny Pacquiao an ngaisang a, boxing lama tui tak takte chuan an entawn a, amah ang ni chho thei turin thenkhatin tan an la mek bawk a. Manny Pacquiao fapa pawh tun hnaiah khan boxing lamppang a ti chhin lai video in an lo la a, chu chu internet-ah a darh nasa hle.

Kum 18-a upa Jimuel chu boxing lamah a mikhual lo hle niin video atang chuan a ngaih theih a. Hetih lai hian Manny chuan a fapa chu boxing luhchilh tura a duh loh thu sawiin, a tui chho tur pawh dan theih a inrin thu a sawi a ni.

Pacquiao chuan, “Ka fapa hian boxing khawvel rawn luhchilh ve lo se ka duh a, theihtawpin helam a buaipui tur pawh hi kan dang mek a. Kan in leh a chhehvelah hian boxing glove hmuh tur a awm lo a, boxing bungrua hrim hrim hmuh tur a awm miah lo a, basketball court chu kan nei,” a ti.

Chhungkaw rethei em em atanga sei lian Manny Pacquiao hian an harsatna paltlangin khawvel hriat hlawh khawpin a invawrh chho thei a. Pacman hian a ngaihdan chuan a fapa Jimuel mai bakah a fa dang pali te tan amah ang bawka harsa taka nun hmang kher loa nun hmang thei turin kawng a sialsak tawh a ni.

Pacman chuan, “Jimuel hnenah hian boxing khawvela ka zuan luh chhan chu kan retheih em vang a nih thu ka sawi tawh a. Ka chhungte chawm thei tur chuan khatianga ka tih kha a ngai miau a, duh thlan theih tur dang ka nei tam lo a ni,” a ti.

“Tuna ka fapain boxing a ti lai vel ka hmuh hian ka rilru a na vawng vawng thin a, ka kawng zawh tawh hnu niin, a hautak zia ka hre chiang a, chu vang tak chuan ka fapa pawh hian boxing chu luhchilh lo se ka duh ber a. Kei leh a nupui Jinkee chuan Jimuel hi kan theih chhung chu boxing lampang luhchilh lo turin kan dang zel ang,” a ti bawk.

Kum 40-a upa Pacquiao hian 1995 khan boxing khawvela hun a hmang tan a, kumin January 19 khan unanimous decision in Adrien Broner a hneh a, kum khat bawr vel chu inhnek zui zel a la tum niin a sawi.