Boxing a chawlhsan thu a puan zet hnuah Manny Pacquiao chuan boxing ring chhung a rap leh dawn ta a, November ni 5, 2016 hian American WBO welterweight champion Jessie Vargas nen an inhnek dawn a ni.

Kum 37 mi eight-division world champion lo ni tawh Pacquiao hian April thlaa Timothy Bradley a hneh hnu khan boxing a chawlhsan thu a puang a. Hetih lai hian a promoter Bob Arum chuan thla hmasa lawk khan Pacman hian boxing ring chhung a luh leh tur thu a sawi a nih kha.

"Manny hi chawl hman a la ni lo, Boxing hi a thisenah a bet tlat tawh a, training a neihte hian amaha thawpiknate hi a kiang thin. Hei vang hian atan chuan training leh inhnek hi amahah chuan awmzia nasa tak a nei reng a ni," tiin Pacman-a manager Michael Koncz chuan Los Angeles Times a hrilh.

Pacquiao leh a team-te hi August ni 10-ah Manila-ah an inhmukhawm dawn a, hetah hian kum 27 mi Vargas nen an inhmachhawn dan tur an rel dawn a, inhnekna hmun tur chu Los Angeles-ah nge Dubai-ah? tih an ngaihtuah dawn a ni.

Source : bbc

Picture credit : Getty