10 Jul 2019 05:36

inkhel

Ozil hi kan cho phak a ni lo: Fenerbahce

Fenerbahce chuan Arsenal star Mesut Ozil chu la duh viau mahse an tan lak luh ngaihna a awm loh thu an sawi.

Mesut Ozil chuan 2013 khan Real Madrid atangin Arsenal a zawm a, Emirates Stadium-ah player pawimawh berte zingah a tel chho deuh zel a, tun hnaiah sawisel a hlawh ta viau thung a. Arsenal lampang chuan transfer window inhawn chhunga chhuahtir dan an ngaihtuah mek niin an sawi a, Turkish club Fenerbahce nen hian an sawi zawm mek a ni.

Unai Emery hnuaiah Mesut Ozil chuan khelhna hmun a chang tlem hle a, German playmaker hian hlawh a la hnem si a, khelmualah duhthusamin a khel lo thin a, hei vang hian player hlawh atana sum an seng vak vak tiziaawm thei turin hmun danga kaltir dan hi an ngaihtuah phah a ni.

Super Lig club Fenerbahce chuan thu chhuah an siam a, “Mesut Ozil hi player tha tak mai a ni a, thlahtu lam atanga Turkish thisen kai a nih avangin kan ram aiawhtu a nihna lai hi a la awm ve reng a. Feberbahce nen an sawi zawm te hi thil lawmawm tak a tling,” an ti.

“Amaherawhchu, Fenerbahce hian Mesut Ozil hi lei emaw, lak emaw kan la dil lo reng reng a. Kan sum dinhmun kan hre chiang a, Ozil la thei turin kan sum dinhmun a tha lo a, tih ngaihna a awm lo a ni,” an ti bawk.

“Kan president Ali Koc chuan June 20 khan WinWin program-ah hemi chungchang hi a lo sawi chhuak tawh a, keini club ang chuan Mesut Ozil te chu lak ngam chi a ni lo tih a sawi a, a man hrim hrim bakah a hlawh pek tur hi a tam tham em a, kan cho phak rual a ni lo,” tiin an tarlang.

Nikum February thlaah khan Mesut Ozil chuan kum thum leh a chanve chhung atan contract a ziak thar a, 2017-18 season tawpah khan free transfer-in a chhuak thei hman tep a, a thlawna chhuahtir an hlauh avangin contract thar hi an ziahpui a, a hlawh pawh a sang chho hle a ni.

January 2018 ah Manchester United lam panin Alexis Sanchez a chhuak a, a hnu lawkah Ozil chu contract thar an ziahpui a, Arsenal chu an lawm viau a. Mahse, contract a ziah thar hnuah hian beisei angin khelmualah a che tha vak lo a, hei vang hian Arsenal chuan an rilru an thlak leh phah a ni.

Emery kaihhruaina hnuaiah Ozil chu khelmualah hmuh tur a tam lo sawt hle a, 2018-19 season chhung khan Premier League game 20 chiah a khel ve a ni.