Arsene Wenger chuan Mesut Ozil chu a hlawh sang lutuk vangin a inthlahdah a, a tlakhniam phah nia a hriat thu a sawi.
Arsenal chuan nikum January thla khan Arsene Wenger la awm laiin German playmaker Mesut Ozil chu contract thar an ziahpui a. Ozil hian 2021 thlenga Arsenal tana khel turin contract hi a ziak a, kar khatah £350,000 (Rs. 3,23,35,671.7) a hlawh ziah dawn bawk a ni.
Nikuma Arsenal in Ozil contract an ziahpui lai hian Wenger chu manager la ni mahse contract thar tih vel chu club thuneihna a nih thu a sawi a. A thu chu ni se Ozil kha contract thar a ziahpui leh dawn a nih pawhin tuna an chhawpsak ang em em hi a nih a rin loh thu a sawi.
Unai Emery chuan Mesut Ozil hi a khelhtir tlem hle a, hetianga a khelhtir ngai loh chhan hi chhuanlam hrang hrang a nei tawh a. Kum 30-a upa Ozil hi lei duhtu an awm a nih chuan Arsenal hian hralh chhuah vat an pawi ti lo hle a ni.
Wenger chuan, “Hetianga Ozil a tlakhniam chhan hi a contract rei zawng chu a nih ka ring hauh lo a, squad-a tel tur thlan chhuah kawngah pawh contract neih dan chuan kawngro a su lo bawk ang a. Mahse, chutiang piah lamah chuan thil tam tak awm thei chu a awm chiang a ni,” a ti.
“Player tha tak kan lei thin a, kum nga chhung atan kan inrem vang khan chumi kum nga chhung chuan player tha tak kan nei tluan zak dawn tihna emaw kan ti thin a, hei hi chu kan hre fuh lo hle a. Kum nga atan contract kan ziah avang khan thahnem an ngai reng kher lo a, theihtawp an chhuah reng kher lo,” a ti bawk.
A sawi zelnaah, “Tun dinhmunah hi chuan Mesut Ozil hian hlawh sang tak a nei a, khel lo mahse a hlawh a kiam phah dawn chuang lo a. A khelh that leh a khelh chhiatin a hlawh lamah kawngro a su tham vak dawn lo tih a hria a, ngaihtha takin a awm vel mai mai ni berin ka hria,” a ti.
Tun season chhungin Ozil hian Premier League game 14 a khel ve tawh a, hengah hian goal 3 a thun tawh a, mi goal thun tur vawi khat a siamsak a. Europa League lamah vawi thum khel tawhin goal khat a thun a, mi goal thun tur vawi khat a siam a, FA Cup ah vawi khat a inlan tawh bawk a. A vaiin tun season chhungin game 18 a khel tawh a, hengah hian goal 4 thunin, mi goal thun tur vawi 2 a siamsak tawh a ni.