08 Nov 2018 04:53

inkhel

Over khatah run 43 an vaw chhuak

New Zealand batsman pahnih Joe Carter leh Brett Hampton te inkawp chuan over khat (ball 6) ah run 43 ngawt mai an hlawh chhuak a, world record ding lai khumin record thar an siam.

Joe Carter leh Brett Hampton te hi New Zealand ram chhunga one-day cricket match khelhah an inkawp a, Northern District leh Central District inkhelh tumin Northern District tan an ding dun a. An pahniha an din lai hian over khatah run 43 ngawt mai an hlawh chhuak a, world record thar hi an siam theih phah a ni.

Nilainia Hamilton khuaa inkhelah hian Central District tan South Africa rama piang fast bowler Willem Ludick chuan a vawm hnuhnun ber over tur a hmachhawn mek a, over 10 a vawmna tur niin, a hmain wicket khat a la a, run 42 chu a pe tawh a.

Ball hmasa ber a vawm a, bat sirin an lo vua a, wicketkeeper man theih lohin a chhuak a, run 4 a ni nghal phawt a. Ball hnihna chu a vawm sang lutuk a, kawng chungah a vawm phei ve ve a no ball a ni a, heng ball pahnih hi Brett Hampton chuan leg-side lamah lo vuain 6 a vaw chhuak ve ve a.

Willem Ludick chu a che fuh lo laklawh a, a vawm leh chu dik mahse run 6 an lo vaw chhuak leh a. Hemi hnu hian ball 3-na a vawm leh a, run 1 chiah an siam a. Ball 4-na atanga ball 6-na thleng chuan run 6 an lo vaw chhuak leh vek a, heti hian over khat a vawmah run 43 ngawt mai Northern District chuan an lo vaw chhuak thei a. Ludick hian over 10 a vawmah run 85 pein wicket 1 chu a la ta a ni.

A hmaa List A one-day match record chu over khata run 39 a ni a, Dhaka Premier League-a Sheikh Jamal Dhanmondi leh Abahani Ltd inkhelh tumin Zimbabwe player Elton Chigumbura chuan he record hi a siam a ni.

International cricket bikah chuan over khata run siam hnem ber chu 36 a ni a, ODI ah chuan 2007 khan St. Kitts a World Cup an khelhin Herschelle Gibbs chuan over khata Netherlands bowler Daan van Bunge ball vawm 6 a hmachhawnah run 6 vek a vaw chhuak a. T20 internationals ah Yuvraj Singh chuan Durban khuaa 2007 World T20 an khelhin Stuart Broad ball vawm 6 a hmachhawn chu run 6 vekah a lo chantir tawh bawk a ni.