Napoli-in an striker Victor Osimhen fiamthu tawh nana an hman chungchangah, Nigerian striker agent Roberto Calenda a lawm lo hle a, dan anga thil kalpui a duh thu sawi chhuakin Napoli a vau.

Bologna laka penalty a hlah tum khan, kha video kha Napoli Tiktok account-ah post a ni a, voice an dub chawp a,  ''gimme penalty please" tiin video an siam. Kha post kha Napoli chuan an delete leh tawh a, mahse Roberto Calenda a lawm thei lo.

"Victor-a zahawmna humhim a nih theih nan dan hmanga thil kalpui ka duh a ni. Tiktok-a Napoli official account hmanga an thil post kha pawm zam theih a ni lo," tiin Roberto Calenda chuan X-ah a tarlang.

"Victor-a tihnawmnahna video chu mipui hmuh theih tura post a ni a, a hnuah delete a ni leh tawh a. He thil hian player lakah thil tha lo tak a thlen thei.

"Tin, tun hnaiah transfer thuthang leh fake news chi hrang hrang hmanga Victor hi beih a ni bawk a, Victor-a chunga thil thleng hi en liam chi a ni lo," tiin Roberto Calenda chuan a sawi bawk.

Bologna nena goal awm lova an inhnehtawk tum khan, minute 86-ah Osimhen hi Rudi Garcia chuan a la chhuak a, khami chungchang pawh khan media a luah hat bawk.

Kum 2020 nipui lai khan Napoli chuan Nigeria international hi club record 81.3m euros in an lei. Season liamtaa Serie A title an lak theih nan tha a thawh hlawk hle a, kum 24 mi Osimhen hian sason hmasa khan league game 32 atangin goal 26 a khung a ni.

Tun nipui bazar liamtaah khan Osimhen hi club lian tak tak Chelsea leh Manchester United te nen sawi zawm a ni a, mahse Napoli-ah a cham chhunzawm zel a. Tun season-ah game 6 atangin goal 3 a khung tawh a ni.