Liverpool manager Jurgen Klopp chuan an striker chhuak tur Divock Origi chu Liverpool legend a nih thu leh a, a player enkawl tawh a pawimawh ber zinga mi a nih thu a sawi.

Belgian striker Origi hian tun season zawh rualin Liverpool-a a contract a hmang zo dawn a, Liverpool hian contract thar zawrh mah se Origi hian a hnawl a, Liverpool a chhuahsan dawn.

Klopp chuan, “Divock hi mumal taka kan thlah ka beisei a, ka tan chuan Liverpool legend a ni reng tawh dawn a, thawhpui a nuam takzet a ni. Ka player enkawl tawha pawimawh ber zinga mi a ni a, khawiah pawh kal se a hlawhtling dawn tih ka chiang. Kan tan thlahliam a harsa hle dawn a, Liverpool legend a ni chiang a ni,” tiin Origi chungchang a sawi.

Kum 2014 khan Lille atangin Liverpool hian Origi hi an lalut a, mahse France lamah loan-in Origi hi chhuak leh nghalin, kum 2015 nipui khan Anfield-ah a input lut.

Liverpool-a a awm chhung zawngin kum 27 mi hi a inkhel tam lova, inkhel bul tan vawi 40 chiah nei mah se, inkhel pawimawh tak takah goal pawimawh tak tak a khung theih em avangin Liverpool supporter-te’n an ngaina hle.

Origi hi Premier League club eng emaw zatin lakluh an tum niin chanchinbu mi te chuan an tarlang a, West Ham, Newcastle, Wolves, Southampton leh Crystal Palace te chuan duh vek mah se, AC Milan chuan Origi hi free transder-in an lalut dawn niin a lang a, inremna an nei tawh nia tarlan a ni.