30 Aug 2020 06:45

inkhel

Online Chess: Mizo Junior Team A an champion

Mizorama a vawi khatna atana buatsaih, 1st Mizo Online Team Chess Tournament ah Mizo Junior Team A te chu an chungnung ber.

1st Mizo Online Chess Tournament hi 29.8.2020 zana khan khelh zawh a ni a, team hrang hrangte chu pakhatna nih tumin an inel a, heng zingah hian Mizo Junior Team A te chu senior player tha tak tak karah an che tha ber a, an champion a ni.

Mizo Junior Team A te hi Mizo Online Team Chess Tournament-a champion hmasa ber an ni a, an ni aia thiam paih thla theitu team an awm hma chu Mizo Team Chess champion nihna hi an chelh dawn a ni mai a. Mizo chess chanchinah chuan junior player te hmasawnna ropui ber pawl a ni a tih theih.

Champion ta, Mizo Junior Team A player te hi kum 20 hnuai lam vek an ni a, an hmabak chu a eng hle a. Point hmu sang ber leh champion team te hian point 129 an hmu a, a hmu tlem ber team chuan point 8 chauh an hmu thung a ni.

He inelnaah hian team 10 lai an tel thei a, team khatah player 5 zel awmin, he inelnaa tel zawng zawng hi an vaiin mi 50 an ni a. Mizoram Open Chess Tournament khelh thin pangngai ang zat deuh thuak an tel a. Tun tuma champion ta Mizo Junior Team A hian Kolkata Titan chu hmanni lawkah an lo hneh tawh bawk a ni.

Team ding hmasa leh thiam bera ngaih Mizo Rising Star chu tun tumah hian pahnihna an ni a, an player tha ber pakhat a khel thei lo chunga pahnihna an ni thei hi an fakawm hle.

Team tina player zawng zawngte an thiamin an fakawm tak zet a. Mi mal a thiam ber, point hmu sang ber chu Robert Runremmawia, Mizo Rising Star player a ni.