"Oman hneh ngei ngei a ngai." - Jeje.

09th June 2015, 08:06PM

Mohun Bagan forward Jeje Lalpekhlua chuan 2018 World Cup qualifier-a Oman an hmachhawn tur a thlir a, India team chuan chak an mamawh tih a sawi.

India leh Oman hi tunkar Ningani hian an inkhel dawn a, India team hi an inpuahchah nasa tawh hle.

Jeje hian tun season-ah hliam vangin Mohun Bagan tan a khel tam thei lo va, season tawp dawn hnaiah a dam a Kolkata club hi I-League-ah an champion.

Pune FC striker hlui Jeje chuan, "Tunah chuan ka fit tawh a, a hma khan ka khupah hliam ka nei. Oman lakah hian 100% in ka khelh theih ka ring a fans-te pawhin min tawiawm leh ka ring bawk."

"Kan khelhna turah hian nomawi kan (Mohun Bagan) chawi tawh a hetiang deuh bawk hi Oman kan hmachhawn hunah a thlen ka beisei." tiin a sawi.

Chennayin FC forward hian I-League-ah an champion hnuin Kolkata-ah an fans tam takin an lo lawm avangin lawmthu a sawi bawk a, he khawpui anga football ngaina hi India ramah an awm loh thu a sawi.

Jeje hian India coach Stephen Constantine enkawlna hnuaia a game hmasa ber tur hi thlir a, an coach duan ang thlap a an khelh theih chuan result tha an neih ngei a ring.

Sawi chhunzawmin,"Constantine hian player tin tan duan a nei. Oman kan hmachhawn tur hi a pawimawh a kan tlin chuan ranking-ah hma kan sawn ang. Coach duhdan hi kan zawm zel tur a ni." a ti.

India national team-ah hian player tawnhriat ngah tawh tak tak an ther fur a, mahse hei hi Jeje chuan hei hi thil pawimawh berah a ngailo.

Sawi zelin, "Tawnhriat ngah hian awmzia a neih tam ka ring lo. Coach-in ti tura min duh kan zawm chuan tawnhriat hi buaina tham anih ka ring lo. Oman lakah hian hnehna kan chan a ngai." tiin a sawi.

A hun kal tawh pawh thlir kirin Jeje chuan, "Pune FC ka chhuahsan hma khan ka khupah hliam ka nei a, kum khat dawn lai inkhel thei lovin ka awm. Rim takin ka thawk a tichuan ka lokir. Pune FC-ah khan kum sarih vel ka awm a Kolkata club zawm turin tawnhriat ka la nei tawk lo."

"Dempo-ah ka luh hnuin Kolkata-ah ka insawn ta a ni. Sum ang zawnga thlirin club dang sawmtu an awm chuan sum a hmuh hnem theih a tichuan zawm a ni mai." tiin a ngaihdan a sawi.

Hnahthial khawchhuak Jeje hian kum 2014 May thla khan Mohun Bagan hi zawmin Kolkata-ah a lut.

A huntawn tawh china nuam a tih ber an zawhna pawh Jeje chuan, "Indian national team tan ka game hmasa ber Chinese Taipei lakah ka khelh a goal ka khung kha niin ka hria." tiin a chang bawk a ni.

India leh Chinese Taipei hi kum 2011 March ni 21 khan 2012 AFC Challenge Cup qualification match-ah an inkhel. Jeje hian India national team tan a game hnihnaah pawh goal hnih a khung lehnghal a, Taipei an hneh hnu ni hnihah Pakistan nen AFC Challenge Cup Qualification match-ah tho hian an in hmachhawn a goal hnih hi a khung leh a ni.

Copyright © inkhel.com 2024. All rights reserved.