Tai Tzu Ying chuan kum 10 chhung badminton khawvela a tal laiin theihtawp a chhuah thin tih sawiin, kum thara Tokyo khawpuia Olympic neih hunah tel leh a tum thu a sawi a, chumi hnuah chuan chawlh a tum thu a sawi.
Taiwanese shuttler Tai Tzu Ying chu hmeichhe singles-ah world number 1 a ni mek a, 2020 Tokyo Olympics ah a tawpna atan tel leh a la tum a, chumi hnuah badminton khelh chu bansan a tum tawh a ni.
World No. 1 ni mahse Tai Tzu Ying hian a thil tum puitlin theih loh pahnih a la nei a, Olympic gold medal lak a tumna chu a la tihlawhtling lo a, World Championships gold medal pawh a la thei rih lo bawk a. Inkhelh a chawlhsan hma ngeiin heng thil pahnih hi tihpuitlin hman hram a tum dawn a ni.
December 2016 atang khan Tai Tzu hi khawvel hmeichhe zinga badminton khelh thiam ber a ni chho deuh char char a, nikum April thla khan chawlhkar khat chiah a dinhmun luah hi a kalsan ve zuai a ni.
2016 season tan tirh atanga tun thlengin Tai Tzu hian tournament final vawi 24 a lut tawh a, hengah hian vawi 19 chu a champion tawh a. A champion tawhnaah chuan nikuma Asian Games gold medal a lak kha a la ropui ber a ni.
Olympics bikah chuan a thlen san ber chu pre-quarter final niin, World Championships ah pawh quarter final aia sang a la thleng thei lo a, a chawlh hmaa a tawp thlen theih ve ve chu a duhthusam a ni.
Tai Tzu chuan, “Ranking-ah a chungnung ber ni chho ngar ngar mah ila, title lian pahnih hi ka la lak theih loh avangin a la kim lo hle a. Kumin hian Basel-ah World Championships title lak ngei ka tum dawn a, kum tharah Tokyo khawpuiah Olympic gold medal lak ka tum leh dawn bawk a ni,” a ti.
“Olympic medal ka la thei a nih ngat chuan badminton khawvelah a kal a kim dawn tihna a ni ang a, mahse medal ka la thei emaw, thei lo emaw, Olympic zawhah chuan ka chawlh tawh hrim hrim dawn a ni,” a ti bawk.
A sawi zelnaah, “Kum 10 chhung chu badminton khelin theihtawp ka lo chhuah ve ta reng mai a, ka duhtawk ta viau a. Player dangte aia ka tet bik avang hian court chhungah pawh ka tlan hnem a ngaih phah a, a hahthlak zual bik tlat a ni,” a ti.
Badminton khelh a chawlhsan hnua a awm dan tur chu Tai Tzu hian a sawi rih lo a ni.