MC Mary Kom chuan amah chotu Nikhat Zareen chu hnehin kum thara China rama Olympic qualifier-ah a tel thei dawn.

Hun rei tak boruak a awm chho tawh a, Nikhat Zareen chuan India aiawha feh chhuah a duh thu sawiin, MC Mary Kom aiin Olympic qualifier-a tel hi a phu zawk niin a sawi fo a. Thuneitute chuan Mary Kom hi an thlang hman lek lek a, hetiang boruak a awm takah chuan anni pahnih hi an inhnektir ta a ni.

Vawi 6 ngawt world champion lo ni tawh Mary Kom (51 kg) hi an inhnekah hian a chungnung zawk daih a, a tawpah 9-1 ngawtin a chak ta zawk a. Heti chung hian Nikhat Zareen tawiawmtu Telangana Boxing Association hruaitu thenkhatte chuan result chu lungawithlak loh niin an la sawi zui a ni.

Result an puan chiah hian Telangana Boxing Association lam chuan thawm an nei zui nghal vat a, rei tak an sawi buai hmain Boxing Federation of India President Ajay Singh chu a inrawlh vat a, boruak pawh a hnuah a dai ve thei chauh a ni.

Telangana Boxing Association aiawh AP Reddy chuan, “Result kha keini chuan kan pawm thei lo a, thil dik lo a awm niin kan hre tlat a. Hetiang thil tenawm tak a awm chhung chuan engtin nge kan ramah boxing hian hma a sawn theih ang?” a ti a ni.

Ajay Singh chuan Nikhat Zareen tawiawmtute chu inthiarfihlim turin a hrilh a, hetianga a tih hnuah hian boruak pawh tlemin a ziaawm chho ve thei chauh a ni.

World silver medallist lo ni tawh Sonia Lather (57 kg) chu Sakshi Chaudhary chuan a hneh a. Asian medallist pawh lo ni tawh Lather hian che rang em em mai Chaudhary chu a khing let thei meuh lo a ni.

60 kg category lamah world champion hlui L Sarita Devi chuan national champion Simranjit Kaur chu a hneh lo a. Simranjit Kaur chu a che rang zawk a, a hnek fuh thei zawk tlat bawk a, a chungnung zawkah a tan theih phah a ni.

Vawi hnih ngawt world medallist lo ni tawh Lovlina Borgohain (69 kg) chuan Lalita a hneh a, Olympic qualifier-ah hian a tel ve thei dawn bawk a ni.