05 Jul 2019 07:31

inkhel

Olympic Medallist Nl.Lalremsiami lawmpuina hun hmang

Sports Authority of India, SAG, Aizawl chuan July ni 5, Zirtawpni khan India hockey player & Youth Olympic Medallist Nl.Lalremsiami lawmpuina hun an hmang a, Sports Director hlui Pu Zoliana Royte chu he hunah hian huallian a ni.

Pu C.Hmingthangvunga, Karate Coach in a kaihhruai inkhawmah hian Pu Zoliana chuan,"Lalremsiami rawn chawrchhuahna SAI Extension Centre, Thenzawl hockey academy chu a hunlaia din a nih thu leh, khatih hunlaia hmathlir nei chunga an kalpui chu vawiin ni thlenga hmeichhe hockey player te hlawhtlin chhan a ni" a ti a. Hetianga player hlawhtling te chawimawina chang in hria hi SAI dept.hotute in fakawm hle a ni, a ti bawk. Pu Zoliana chuan hetiang huna Sports dept. thuneitu sang te hmel an lang tam theilo chu pawi a tih thu leh tun hnuah chuan a tam thei ang ber inlan thin tawh se a duhthu a sawi bawk.

Khual zahawm Pu Francis Marwin, Regional Director, SAI, NERC Imphal pawhin thu sawiin hetiang player hlawhtlin lawmna hun an hmang thei chu player te bakah coach leh staff te inpekna vang a ni tih a sawi a, nasa lehzuala tang sauh sauh turin Remsiami chu a chah a ni.

SAI Thenzawl hotunu Pi Lalrampari chuan Lalremsiami chu naupang thuawih, thununna ngai pawimawh mi a ni tih sawiin, chu chu tun dinhmun hruaithlengtu a ni tih a sawi bawk. Ms Rampari chuan Hockey ah Mizo hmeichhiate tan chance tam tak a awm thu te - Thenzawl Hockey training Centre atangin International player-8 leh National medallist tamtak an lo chherchhuah tawh thu te, hockey atanga hlawhtlinna an neih vanga central dept.a hna hmu an awm nual thu te a sawi bawk.

He Felicitation programme ah hian Nl.Lalremsiami bakah, India Hockey player lo ni tawh Nl. Lalrindiki te, Hockey Coach Lalrothuami leh Centre Incharge Pi Lalrampari te hnenah lawmpuina hlan a ni.

He hunah hian Mission vengthlang YMA Branch aiawh leh Local Council aiawhten Lalremsiami chu lawmpuina an hlan bawk.

He programme hi Pu Lianminthang, Deputy Director, SAI, NERC Imphal in lawmthu sawiin a khar a ni.