28 Nov 2018 04:52

inkhel

Olympic gold medal lak tum Mary Kom

MC Mary Kom chuan world title vawi 6 a lak hnuah Olympic gold medal lak chu a tum ber a nih thu sawiin, tun atangin ngawh taka a inpuahchah tan thu a sawi.

Kum 36-a upa Mary Kom chuan Women’s World Championship-ah gold medal a la chiah a, khawvela hmeichhe boxer zinga hetiang ti thei hmasa ber niin, silver medal pakhat a lak tawh nen a vaiin world championship medal 7 a la tling tawh a, he tournament-ah hian boxer hlawhtling ber a ni.

Manipuri boxer Mary Kom chuan, “Olympic medal chu ka nei tawh a, 2012 khan bronze medal ka lo dawng tawh a, bronze medal dawn hi thil harsa leh lawmawm tak ni mahse ka beisei leh ka lo suangtuah a ni lo a. Ka duhthusam ber chu gold medal lak a ni a, ka duhthusam hi thlentir theih ngei ka tum a ni,” a ti.

“World Championship gold medal ka la thei kha ka lawm khawp mai a, kha khan inrintawkna nasa zawk min neihtir phah a. Tokyo Olympics gold medal lak theih ngei ka tum hle a, India ram tana gold medal la thei ngei turin a hmaa ka inpuahchahna aia nasa lehzualin hma ka la dawn a ni,” a ti bawk.

Mary Kom chuan World Championship-ah khan 48kg category-ah gold medal kha a la a, mahse Olympic-ah chuan 51kg ah a chhoh a ngai dawn a ni.

Union Minister for Women and Child Development Maneka Gandhi chu World Championship-a Mary Kom-i’n gold medal a lak hlim khan JLN Stadium-ah a awm ve a, Mary chu ram tan ro hlu tak a nih thu a sawi.

Maneka Gandhi chuan, “Mary Kom hian world title vawi 6 a la thei a, sportsman spirit dik tak a lan chhuahtir avang leh tlema la naupang zawkte tana entawntlak taka a nun avangin lawmawm kan ti lehzual a ni,” a ti.

A hlawhtlin theih chhan sawiin Mary chuan, “Training ka neih hian tih tak zetin ka inpuahchah thin a, tih mai mai hi ka duh lo a, thahnemngai takin engkim ka ti a. Hetianga ka inpuahchah loh chuan eng tikah mah ka hlawhtling thei dawn lo a ni,” a ti.