14 Oct 2019 09:22

inkhel

Olympic gold medal lak ka tum: Roger Federer

Roger Federer chuan 2020 Olympic Games-ah tel a tum thu sawiin, Olympic gold medal lak theih ngei a tum thu a sawi.

Swiss maestro Roger Federer chuan Olympic medal hi a hmain pahnih a lo la tawh a. 2008 kumah khan Beijing Olympics-ah Stan Wawrinka nen men’s doubles-ah an tang dun a, gold medal an la a. 2012 kumah khan London khawpuiah singles-ah silver medal a lo la tawh bawk a, final-ah Andy Murray a hneh lo a ni.

Kum 38-a upa Federer hi 2000 Olympics-ah khan ram aiawhin a tel ve ngei a, singles-ah Arnaud Di Pasquale nen pathumna an inchuh a, Federer hi a chak ta lo a, bronze medal a la thei ta lo a. 2004 kumah pawh pathumna inchuhnaah a chak lo leh a, Rio 2016 ah khan a khup a nat avangin a tel thei ta lo bawk.

Vawi 20 ngawt grand slam title lo la tawh Federer hi tun hnaiah Davis Cup lama a inlan tam loh avangin wildcard a mamawh ngei a rinawm a. John Isner nen exhibition match an khelh hnuah Olympics-a tel leh a tum thu hi a sawi chiang chiah a ni.

Federer chuan, “Ka team te nen kan sawiho nasa a, thla khat chuang chu Olympics-a ka tel dawn leh dawn loh hi kan sawiho tawh a. Wimbledon zawh hnu, US Open khelh hma si hun awla ka awm dan turah hian thutlukna kan siam thei lawk lo a ni,” a ti.

“A tawpah chuan ka thinlungah Olympic Games-a la tel leh theih ngei chu a tla na ta ber a. Switzerland flag hi Athens-ah leh Beijing-ah khan ka lo keng ve tawh a, gold medal leh silver medal ka la a. Olympics-ah hian tel leh ngei hi ka duh hle a, ka phur em em bawk a, gold medal lak theih ngei hi ka duhthusam a ni,” a ti bawk.

Roger Federer hian tun season chhungin ATP Tour title pathum a la tawh a, Wimbledon final-ah Novak Djokovic a hneh lo a, French Open semi final a thleng thei bawk a ni.