Europa League group stage inkhelah Manchester United chuan Old Trafford-ah Serbian club FK Partizan an lo mikhuala, United hi si thum faiin an chak.

United tan hian an rawlthar Mason Greenwood chuan goal hmasa ber a khunga, darkar chanve vel khelh a nihin Anthony Martial chuan United goal hnihna khungin, Marcus Rashford chuan second half tir lamah United goal thumna a khung.

United manager Ole Gunnar Solskjaer chu an khelh danah a lawm niin a langa, a tla hma pathumte lakah a bik takin a lawma, an goal khung danah pawh a lung a awi. Solskjaer chuan, “Kan goal thun danah khan ka lawm hlawm em em a, kan finish dan kha a lungawi thlaka, goal thum class tak tak vek an ni.

“Kha aia goal thun hnem thei kan ni chianga, mahse kan goal hmasa khan kan dinhmun a sawh nghet nghal. Mason kha a khel tha em em a, goalkeeper a tluk hnuah a rilru a thlaka, a buai eih lova, min ti lawm hle.

“Anthony-a goal kha a mawi berin ka hria a, Marcus-a’n a ke veilamin a ti goal bawka, ka lungawi hle. Marcus hian a ke veilamin a khung zeuh zeuh a ngai dawna, a chhan chu a tlanna lamin a zir vang a ni. Marcus kha a awmna hmun a dik thin em em a, pass tha tak tak hmu in a inpawt nalh thin viau bawk.

“Marcus khan chance a ngaha, an goalkeeper khan a save nual a, a changin goal zawnah a pet lo ve bawka, mahse goal a khung dan khan inrintawkna nasa tak a pe ngei ang. Partizan laka kan khelh dan hi kan khelh duhdan lan chhuahna a ni a, mahse lehlam khan khati ang taka khel tha tur khan min siam ve bawka, anmahni ka zah loh vang ni lovin, Partizan khan hmun awl min siamsak nasa em a ni.

“Vawi tam tak 1-0 a hma kan hruai hnuah goal dang kan khung belh thei lo fo thina, chuvang chuan goal khat kan khung hnuah goal hnih kan khung belh khan min ti lawm. Ka naute hi an inzir zela, hemi game atang pawh hian hmasawnna tur tam tak an zir chhuah ngei ka beisei a, kan tumpuite kha Premier League level ni lo mahse thil tha tam tak zir chhuah tur a awm tho a ni,” a ti.