11 Feb 2019 01:30

inkhel

Oldham manager thar Scholes

League Two club Oldham Athletic chuan an manager thar atan Manchester United legend Paul Scoles an ruat.

Thawhtanni atang hian Scholes hian a hna a zawm nghal dawn a, thawhtanni chawhnu lamah Oldham hian an manager thar hi an puangzar ang.

Scholes hian League Two hnuai leh National League-a Salford City-ah neitu nihna a neih avangin Salford atang hian Scholes hian player a lei emaw Salford hnena player a hralh phal a ni dawn lo.

Nikum December ni 27 khan Oldham hian an manager Frankie Bunn an ban a, Scholes an rawih hma zawng hian an academy head coach Pete Wild chuan Oldham senior team hi a lo enkawl lailawk a ni.

Kum 44 mi Scholes hian kum 2015 khan Salford City a lo enkawl zuai tawh a, hemi bak hi club enkawl a la nei lo. A vanglaia Premier League midfielder tha ber zinga mi Scholes hi management lamah eng nge a an dawn hriat a chakawm hle.

Salford khaw chhuak Scholes hi BT Sport pundit a ni bawk a, a pundit hna hi kalsanin manager hna a thawk dawn niin a lang.

Scholes hian a career chhung zawng Manchester United tan a khel a, England midfielder awm tawh zawng zawnga ropui ber pakhat a ni. Kum 2011 khan inkhel chawlhsanin , United-in an mamawh em avangin season khat dang inkhel lehin kum 2013 khan inkhel a chawlhsan fel tak tak ta a ni.