06 Dec 2018 03:52

inkhel

Old Trafford-ah United leh Arsenal-ten point an insem

Premier League inkhelah Manchester United chuan Old Trafford-ah Arsenal an lo mikhuala, chak zawk awm lovin team hnihte hi 2-2 in an inhnehtawk.

United manager Jose Mourinho chuan Paul Pogba leh Romelu Lukaku-te chu inkhel bul a tan tir lova, defender naupang Diogo Dalot erawh a vawi khat nan Premier League-ah inkhel bul a tan. Arsenal lamah season tawpa chhuak tur Aaron Ramsey chuan inkhel bul a tan a, captain arm-band hlan a ni nghe nghe a, mahse a inhliam avangin a inkhel tluan thei lo.

United tan Anthony Martial leh Jesse Lingard-ten goal an khunga, Arsenal tan Shkodran Mustafi leh Alexandre Lacazette-te chuan goal an khung ve bawka, Arsenal hi a zawnin game 20 chhung an tlawm tawh lova, heti anga an chet that hnuhnung ber chu kum 2007 daih tawh kha a ni.

United hian khelh 15-ah point 23 hlawhchhuak tawhin pariatnaah an awm meka, Arsenal hian khel 15 atangin point 31 hlawhchhuak tawhin panganaah an awm mek a, palinaa awm Chelsea nen an point hmuhzat a inang chiah tawh.

Manchester United 2-2 Arsenal

(Martial 30’, Lingard 69’) (Mustafi 26’, Lacazette 68’)

PLAYER RATINGS

MAN UNITED: De Gea 6, Darmian 6, Bailly 6, Rojo 6, Smalling 7, Dalot 7, Herrera 7, Matic 7, Martial 7, Lingard 7, Rashford 7. Subs: Lukaku 6, Fellaini 5, Pogba 5.

ARSENAL: Leno 6, Bellerin 7, Sokratis 6, Mustafi 7, Holding 6, Kolasinac 6, Guendouzi 6, Torreira 7, Ramsey 6, Iwobi 6, Aubameyang 7. Subs: Lichtsteiner 6, Mkhitaryan 7, Lacazette 7.

Match Report

Inkhel tan a ni a, inkhel tan atanga minute li a ralin, box pawn atangin Marcus Rashford chuan a pet a, pet chhe lem lo mahse Arsenal goalkeeper Bernd Leno chuan harsa lutuk lovin a lo save. Minute sawmhnih vel khelh a nihin Arsenal an hlauhawm hle a, mual velamah ball inpe kualin goal zawn lamah ball pe phei thin mahse goal-a thun tur an awm ngai lo. Darkar chanve khelh a nih hma hretin mikhual lam Arsenal-in hma an hruaia, corner atanga ball vawrh luh chu Mustafi chuan lo tauh sawtin, United keeper David De Gea chuan a lo save a, De Gea hian ball chu man si lovin a dang per a, a nam chhuah loh bawk avangin ball chu goal chhungah lutin Ander Herrera chuan pet chhuak leh nghal mahse goal line a pelh avangin referee chu goal-ah a chhiar. United-in goal an chhuah dan hi De Gea tihsual vang a tih theih awm e.

Darkar chanve khelh a nih chiahin United-in an si phurh an suta, goal khungtu hi Anthony Martial a ni. United hian free kick an hmu a, free kick hi Marcos Rojo chuan a peta, Rojo hian pet tha hle mahse Leno chuan a lo save a, Leno-a save per hi Herrera chuan goal zawnah pe phei lehin, Martial hian hnai set sawt atangin chiang takin Gunners goal-ah a lo chhuih lut. Free kick pet a nih hian Martial assist-tu Herrera hi a offside ngei a, mahse lines-man chuan a phar lo. VAR hman chu nise United goal thun hi pawm a nih a rinawm loh. Team hnihten tharum an ngah dun hle a, first half-ah chance nei tam lutuk lo ve ve mahse yellow card erawh hmu an awm nual thung. First half-ah goal khung belh thei an awm lova, 1-1 in tihtawp a ni.

Second half tan a ni a, inkhel a pangai viau, team hnihte an intum tawkin chance hlauhawm erawh an nei khat dun hle. Darkar khat khelh a ni hma hretin United defender Rojo chuan hla tak atanga pet in, pet chhe lem lo mahse goal chungah a kal. 68mins-ah Arsenal-in hma an hruai leh a, Rojo chuan United half-ah tisualin ball chhuhsak a ni a, Lacazette chuan ball hi khalhin goal a khunga, Lacazette hian goal a khung angin ngaih ni mahse chiang zawka replay-a enin Rojo chu a own goal niin a langa, Rojo hian Lacazette-a’n ball a pet hma chiah hian ball hi a rawn tlawh a ni. Goal a luta,United-in an thaha, goal an khung ve leh nghal, centre-a an thah hnuah mual veilama awm Rojo pek niin, Rojo hian ball a vawrh lut nghala, Lingard chuan goal a khung ve leh nghal.

Arsenal-in goal an khung teuh leh nghal hle a, hnai tak atangin Pierre Emerick Aubameyang chuan a hun tha neih a hlaha, De Gea-a’n a lo save. Hemi hnu lawk hian Aubameyang chuan mual veilamah ball khalhin, box pawn atangin United goal-ah a pet a, pet tha hle mahse De Gea chuan tha takin a lo save ve bawk. 90mins-ah Arsenal lamin chance tha tak an nei a, box chhung dinglamah Henrikh Mkhitaryan chuan ball khalhin goal hmazawnah ball a pe phei a, Lucas Torreira chuan lo petin De Gea-a’n a lo save. Team hnihten goal hnih ve ve bak an thun belh thei lova, inkhel hi 2-2 in tihtawp a ni.