Premier League inkhelah Manchester United chuan an home Old Trafford-ah Burnley an lo mikhuala, he inkhelah hian mual neitu lam United hi si hnih faiin an tlawm.
Ol Trafford inkhelah hian Burnley tan Chris Wood leh Jay Rodriguez-te chuan goal khat ve ve an khunga, an team hi point thum pawimawh tak an hlawhchhuahpui.
United hian khelh 24-ah point 34 an hlawhchhuak tawha, pangnaah awm chhunzawm zelin, an chung chiaha awm Chelsea hnaih theihna hun tha an neih chu an bawhpelha, an hnuai chiaha awm Tottenham nen an point an inan bakah pasarihnaah awm Wolves pawhin point 34 ve tho an nei meka, Wolves hi khelh khatin United leh Tottenham aiin an khel tlem zawk bawk.
Burnley hian khelh 24-ah point 30 an hlawhchhuak tawha, 10-naah awm mekin, 10-naa awm mek Arsenal nen thlengin an point hlawhchhuah tawh zat a inang.
Manchester United 0-2 Burnley
(Wood 39’, Rodriguez 56’)
Player Ratings
Manchester United: De Gea 6, Wan-Bissaka 7, Jones 6, Maguire 3, Williams 6, Matic 5, Pereira 4, Fred 4, Mata 4, Martial 4, James 5. Subs: Greenwood 6, Shaw 6, Lingard 6.
Burnley: Pope 6, Lowton 6, Tarkowski 8, Mee 9, Taylor 8. Hendrick 6, Cork 7, Westwood 6, McNeil 7, Rodriguez 7, Wood 7.
Match report tawi
Inkhel an tana, United lamin first half-ah inkhel thunun zawk mahse final third-ah an che bawn hleithei leh chuang lova, 40mins khelh a nih hma in chance tha tak tak pathum an hlah nghe nghe.
20mins khelh a nih hma deuhin Juan Mata chuan Wan-Bissaka chu ball a pe a, Wan-Bissaka hian Anthony Martial-a tan ball cross pheiin Martial hian engahmah a lo chhuah lova, chance tha tak erawh a ni chiang hle. Heta Martial-a ball khawih loh hi Williams chuan a out hma in a lo la a, Perreira pe leh mahse hei pawh hi engahmah chhuak lovin Burnley lamin goalkick an hmu.
20mins chuang khelh a ni chho a, Burnley lamin hla angreng takah freekick an hmu a, an defender-te chu United box lamah an thawn phei; freekick atang hian ball vawrh luh niin Ben Mee chuan a lo khawih hmasa bera, Wood chuan chance tha tak neih phah mahse hnai angreng tak angin ball a lo tauha, goal a zawn lo.
Darkar chanve khelh a nih hma deuhin Matic chuan nalh em emin Mata pe mahse, Mata chuan ball hi lo khawih lovin Martial-a hnenah a kaltlang tira, Martial hian a shoot dawn emaw tih hnuah ball a chawk leha, Taylor chuan hetah hian Martial hi sliding tackle hmangin ball a rawn chhuhsak ta a ni.
Half time hma deuh lawmin Burnley lamin goal an khunga, freekick atanga ball vawrh luh chu Mee bawk chuan a lo khawiha, Wood chuan ball lo changin goal-ah a pet luta, Burnley chuan Old Trafford-ah si khat faiin hma an hruai.
Second half an tan, United hi an khel tha lo viaua, Burnley erawhin fak an phu hle a tih theih awm e. Darkar khat khelh a nih hma deuhin Burnley hian goal an khung belha, Rodriguez chuan Wood chu ball a pass a, Maguire-a hnungah Rodriguez hi a inpawt nghal; Rodriguez hi ball pek leh niin goal-ah a chantir zuia, si hnih faiin Burnley chu hma a hruaipui. Inkhelah goal luh belh a awm tawh lova, Burnley chuan 1962 hnuah a vawi khat nan Old Trafford-ah hnehna an chang ta a ni.
