Zanin zanlai hian Premier League inkhel pawimawh takah Manchester derby kan hmu dawn a, Manchester United chuan old Trafford-ah an thenawm club Manchester City an lo mikhual dawna, kan sana zing dar 12:30-ah an inkhel ang.
He inkhel hi Manchester derby a nih mai bakah tun tumah hian ngaihven a hlawh zual em em a, a chhan chu Manchester club hnih mai bakah United hmelma lian ber leh er ber Liverpool a kaihhnawih tel tlat.
Manchester United hi an ni aia club te zawka an dah City lakah hian an tlawm hreh dawn a, mahse United hi an chak a nih chuan City pawt hniamin Liverpool hi Premier League –ah an champion zui thei bawk.
United hian Premier League tih a nih hnua la champion lo, an er em em Liverpool champion ai chuan City an champion hi pawi an ti lo zawk dawn a, an manager hi an striker hlui, Sir Alex Ferguson-a hnuaia lo tal hrep tawh Ole Gunnar Solskjaer a lo ni bawk nen zanina thil thleng tur hi sawi lawk thiam a harsa hle.
Kum 2009-10 season khan Premier League-ah Chelsea an champion a, hemi tum hian tun season Liverpool leh City an inum ang deuh Chelsea leh Manchester United-te chu an um zak zak. Season tawp lamah Chelsea leh Liverpool-te intumin hemi tum hian Liverpool hian Chelsea an chak tir a ni ber a, anmahni lamin pha mahse United nen an inhal em avangin Steven Gerrard chuan Chelsea goal tur a siamsak a ni ber, Chelsea hi a hnuah an champion zui bawka, United hian point khat chiahin an pha lo.
Kum 2010-a thil thleng kha United chuan an hre reng dawn a, phuba pawh lak an duh dawn chiang. Tun season-ah phuba lakna hun tha em em mai an nei, season thara Champions League khelh loh huamin City hi United hian an chak tir lovang a tih ngawt theih loh.
Tunlai an chet dan enin City hi chak zawk tura ruat an ni sa reng bawka, hnehna an chan ngei pawh rinawmin, United hian theihtawp chhuaha chak an tum ve a rinawm lem lo bawka, sawi lawk theih erawh a ni lo.
United hi tunah paruknaah awmin khelh 34-ah point 64 an nei a, City hi pahnihnaah awmin khelh 34-ah point 86 an nei. City hian point hnihin Liverpool an pha lo mek a, khelh khatin an khel tlem zawk bawk. United lakah City hi an chak a nih chuan khelh inang chiahah Liverpool aiin point khatin an sang dawn tihna a ni.
Team news:
Manchester United tan Ander Herrera, Eric Bailly leh Antonio Valencia-te an khelh theih a rinawm lova, Luke Shaw erawh game thum a awl hnuah lo kir ngei tura ngaih a ni a, Phil Jones a khel thei dawn em a la hriat loh. Manchester City tan hian Belgian playmaker Kevin De Bruyne chu a inlan theih dawn lo tih manager Pep Guardiola chuan a sawi tawh a, ani bak hi inhliam tharlam an nei lo.
Predicted line-up:
Manchester United- De Gea, Dalot, Smalling, Lindelof, Shaw, Matic, Pogba, Fred, Rashford, Sanchez, Lukaku.
Manchester City- Ederson, Walker, Otamendi, Laporte, Mendy, D.Silva, B.Silva, Fernandinho, Sane, Aguero, Sterling.