Manchester United chuan Old Trafford-ah division hniam lama tlakthlak hlau West Brom an mikhual a, Man Utd hian an mikhualte hi si khat faiin an hneh lo a ni.
Goal awmchhun hi free kick atanga lut a ni a, Brunt free kick chu wall-a ding ve Olsson chuan United goal-ah a dang goal a, he goal hi West Brom chakna a ni chhunzawm ta.
Manchester United hian season tawp lam hmangtha viauin, an form chho em em, mahse an match hnuhnung pathumah an tlawm chhunzawm. Champions League khelh an tumna pawh a derthawng leh mek a, khelh thum chiah a awm tawh a, palina Liverpool nen point 4 chiahin an inthlau mek a ni.
Man Utd 0-1 West Brom
Olsson 63′
Man Utd : Dea Gea, Valencia, Smalling, McNair (Falcao - 84' ), Blind (Di María - 63' ), Herrera, Mata, Fellaini, Rooney, Young, Van Persie
West Brom : Myhill, Dawson, McAuley, Olsson, Lescott, Gardner (Wisdom - 89' ), Mulumbu (Baird - 76' ), Yacob, Fletcher, Brunt, Berahino (Ideye - 80' )
Manchester United chuan an striker inhliam dam leh Van persie chu an start tir a, a tir lam a hmuhnawm em em loh. Van Persie hian first half-ah half chance vawi hnih a nei a, box chhunga ball vir paha a shot chu Myhill chuan a lo dan sang a, mual veilam sir atanga Young cross tha zet near post-a a pet chu a goal teuh hle bawk.
Goal hi second half 63rd mins-a lut a ni a. McNair chuan Man Utd player hlui Fletcher chu box pawnah titluin referee chuan free kick a ham a. Box pawn atang chuan Brunt chuan tha zetin free kick a pet, wall-a lo ding ve an lampawl Olsson a per hnuah a goal. Man Utd goalkeeper Dea Gea a che hman lo chiang hle.
Man Utd hian an si phurh rulh tumin theih tawpin an nawr let a, West Brom keeper Myhill an ngam lo a ni ber mai. United hian Berahino handball vangin penalty an hlawh chhuak. Van Persie chuan penalty hi petin, Myhill chuan a lo save sak leh bawk. Hemi hnu hian Van Persie pawhi hian free kick atangin tha zetin a pet, Myhill chuan a lo dang leh.
Bench atanga rawn lut Di Maria pawhin chance tha zet box pawn atangin a nei a, a goal ngei dawn nia a lan laiin Myhill chuan a lo nam over sak leh hlauh a ni. Manchester United hian 2012 December thla atang khan West Brom hi Old Trafford-ah an la hneh leh miah lo. Myhill chu man of the match-a thlan a ni chiang hle a, vawi 9 lai save a nei a ni.
Baggies hi relegate hlauhawm an ni tawh lo niin a lang. 40 points an nei ta a, tuna relegation zone-a awm mek Sunderland nen an inkar chu point 7 a ni a, table-ah 13-na an ni mek. Manchester United hian khelh thum la awm atang hian result tha tak an nei lo a nih chuan Tottenham leh Liverpool te an rawn lawr zawk zawk bawk si a, Champions League khel tura chiang sa nia an inngaihna chu a thamral ve thei bawk a ni.