Paul Pogba chuan Real Madrid zawm chu thil chakawm ber ni mahse tunah rih chuan Old Trafford-ah a la hlim rih thu a sawi.
Manchester United leh France midfielder Paul Pogba hi tun hnaiah Real Madrid nen an sawi zawm zeuh zeuh a. Los Blancos in Zinedine Zidane an rawih nawn hnuah phei chuan thawm hi a tam lehzual a. Real Madrid hian Galactico thar tur an melh kual mek a, hetiang tur hian Pogba hming hi sawi rik tel a ni.
Zinedine Zidane hian hun rei tawh tak atangin Paul Pogba hi a lo ngaisang tawh a, Real Madrid hian midfielder rinrawl pahnih Luka Modric leh Toni Kroos te chu nei mahse tun hnaiah beisei an phak loh thin avangin anni aia chhawr tangkai theih tur hi an melh mek niin an sawi a. Pogba hi Modric leh Kroos te ai chuan che tha thei tura ngaihna a awm mek a ni.
Pogba chuan, “Tun hnaiah thuthang a awm chho nual mai a, a hma daih atanga ka sawi tawh thin angin Real Madrid tana khelh theih te chu footballer te duhthusam a ni deuh vek ang a. Anni hi khawvela club lian berte zinga mi an ni a, chu bakah Zinedine Zidane chu manager a ni leh tawh bawk a, he club zawm theih hi chu a chakawm thlawt a. Football ngainatu naupang atanga professional player thlengin Santiago Bernabeu lama luh theih chu duhthusam a ni,” a ti.
“Tunah tak hi chuan Manchester ah hian ka la hlim khawp mai a. Ka inkhel hnem a, manager thar kan nei tawh lehnghal a. Manchester khawpuiah ka la awm rih a, ka awmna hi thlak tumna thinlung ka la pu rih lo a. Nakin zelah chuan chanchin te pawh a la danglam thei tho a, tu mahin kan hma lam hun kan hre thei lo chu ania,” a ti bawk.
Kum eng emaw zat kalta atang khan Pogba agent Mino Raiola chu Real Madrid president Florentino Perez nen an inbe zeuh zeuh niin an sawi a. Manchester United academy atanga chhuak, Old Trafford-a season thumna hmang mek Pogba chungchang hi Raiola leh Perez te hian an sawi dunna a rei tawh a ni.
Manchester United chuan 2016 nipui lai khan Pogba hi Juventus atangin €105 million zet sengin an lei a, June 2021 thleng contract an ziah sa chu a la dam dawn a. Hetiang a nih avang hian Pogba lak chhuah hi a harsa ve hle dawn a, Manchester United chuan an duh chuan an hralh thei ang a, a man erawh a tlawm vak a rinawm lo hle a. Lei duhtute hnar pawh an tan chuan a harsa vak lo tura ngaih a ni.
France midfielder Pogba hian Jose Mourinho an ban chungchang sawiin, “Eng kha nge fuh lo ber? Chak hmel kan hmu thei tlat lo. Kan chak theih loh em avangin manager pawh kha an thlak ta a ni ber. Chak fo ila chuan tunah hian manager pawh an la thlak miah lo ang,” tiin nui chungin a sawi.