Manchester United chuan Wales winger Daniel James chu Swansea atangin £15 million in an la lut ta.

Daniel James chuan Old Trafford-ah kum nga chhung awm turin thuthlung a ziak a, hemi chhung hian kar khatah £67,000 a hlawh dawn a. A contract a hman zawh hunah hian kum khat chhung atan pawh sei theih turin thu an dah nghal bawk.

Kum 21-a upa Daniel James hi Ole Gunnar Solskjaer hnuaia player an lei hmasak ber a ni a, club ropui tak Manchester United player a ni thei chu lawmawm a tih thu a sawi.

James chuan, “Vawiin hi ka pian chhuah ve tawh hnua ka hun tawnah chuan ka hlim ber tum a la ni a, chona thar ka hmachhawn tur hi theihtawp chhuaha pal tlang theih ka tum dawn a ni,” a ti.

“Ole nena thawh dun vat vat ka chak tawh a, team te nen inhmuh hun a nghahhlelhawm hle a, bul tan vat vat a chakawm tawh viau a. Kan chhungkaw tan chuan hun duhawm tak mai a inher chhuak a, hetih rual hian thla hmasa lawkah ka pain min thihsan a, hetianga ka hun tawn ropui min hmuhpui thei ta lo erawh hi chu a lungchhiatthlak hle a ni,” a ti bawk.

English winger Daniel James hian nikum February thlaah khan professional football a khel tan chiah a, Swansea tan a inlan ve tan a. Manchester United chuan £15 million in an lei a, belh ngai neuh neuh an belh hunah chuan a man hi £22 million velah a chho thei dawn a ni.

A chawr chhuahna
Daniel James hian Brough, Yorkshire a Bull Field-ah ball a pet thin a, rawlthar rual zingah a inkhel thin a, an kum chanve vel lek a nih atangin chutiang chuan a hun a hmang thin.

Sikul a kal laiin South Hunsley High School leh Hull City academy ah te a kal kawp thin a, kum 9 a nih atangin Hull City academy-ah hian a lut tan a, kar khatah vawi thum chu training a zawm thin a ni.

Kum 16 a tlinin Hull-a scholarship lak theihna hun tha a neih chu a bawhzui duh ta lo a, Swansea lam a pan ta daih a. Welsh club hian Elite Player Performance Programme hnuaiah James hi £72,000 an pe ve a, hei hi Hull a hnawl chhan bulpui pakhat a ni.

A vawi khatna atan reserve team lamah an khelhtir ve nghal a, February 2018 ah khan Swansea first team lamah hun a hmang tan ve a. Season liam taah khan Championship game 33 khelin goal 4 chu a thun a, Swansea chu 10-na a nihpui thei a ni.