October 27, 2015 (Thawhlehni) zan Oil India Mizoram Hexa League Season 1 final khelh zawh takah Tuikhuahtlang Table Tennis Club in 3-0 a Bungkawn Games & Sports Association hnehin Mizoram Hexa League champion hmasaber an ni ta.
RL Academy Player of the Tournament ah Bungkawn player R. Lalruatsanga chu thlan a ni a, MHL Most Winner in Singles award Lalmalsawma, Mission Vengthlang TT Club in dawngin, MHL Most Winner in Doubles award Tuikhuahtlang duo C. Lalmuanpuia leh C. Lalmuanawma ten an dawng bawk. MHL Best Disciplined Team award Mission Veng La Paloma in an dawng a, MHL Best Supporters Award Bungkawn Games & Sports Association ten an dawng bawk. Heng mimal leh team award te hian trophy, citation leh sumfai a keng tel vek a ni.
Inkhel thlirna tawi:
Thumvawrah Bungkawn chakin David Zodinpuia chu strong player ah rawn dahchhuakin amah bitum tur hian Tuikhuahtlangin an no. 2 player C. Lalmuanpuia an rawn chhuahtir. Game khatna atangin C. Muana hian a service har leh a vuaknat chhawrin dinhmun tha zawkah a ding. Harsa lutuk lovin 2-0 a hma a hruai hnu-ah David-a hian hma rawn sawn ve in game 3 na a rawn la veleh.
Game 4-na ah Davida’n hma a hruai laiin C. Muana’n time out awmze nei a lak chhawr tangkaiin 3-1 in Bungkawn inghahna David Zodinpuia hi a hneh ta a ni. Tawnhriat ngah zawk David-a hian final boruak sang a zawh loh zawk leh C. Muana khelhthat zan innang avangin Tuikhuahtlang hian 1-0 in hma an hruai phah.
Match hnihna ah tawnhriat ngah Basanta, Tuikhuahtlang leh rawlthar player hmasawn leh huaisen R. Lalruatsanga, Bungkawn in tum ve lehin chak zawk tur rinthiam har khawpa inhnehtawka an inkhelh hnu ah deciding game-ah Basanta’n a tawnhriat ngah leh service har neih chhawr tangkaiin 3-2 in a chak hram.
Tuikhuahtlangin 2-0 a hma hruai chungin Doubles an hmachhawn. An chak leh anih chuan champion an ni tawh mai dawn, Bungkawn tan chuan beiseina la ti nung turin an chak ngei ngei a ngai thung.
Doubles match pawimawhah hian Tuikhuahtlangin an doubles duo, MHL chhung zawnga hneh loh la tawnglo C. Muana leh Lalmuanawma te arena ah rawn luhtirin an mahni hmachhawn tur hian Bungkawn tan R. Lalruatsanga leh Samuel Lahriatpuia te an rawn penchhuak ve bawk. Inkhel hmuhnawm takah takah hian Tuikhuahtlang hian 3-1 a hnehna changing Oil India Mizoram Hexa League a champion hmasa ber an ni ta.
Champion team Tuikhuahtlang Table Tennis Club hian championship trophy, gold medal leh sumfai cheng 80,000/- hum haw in pahnihna Bungkawn G&SA hian trophy, medal leh cheng 50,000 an dawng bawk. Pathumna The Smashers, Vaivakawn hian medal leh cheng 30,000 an hlawhchhuak ve bawk a ni.
Nizan MHL Season I hi Pu P. Saikia, Chief Engineer, Oil india Ltd in a khar.
C. Lalmuanpuia (Tuikhuahtlang) 3-1 David Zodinpuia (Bungkawn)
Basanta Meisnam (Tuikhuahtlang) 3-2 R. Lalruatsanga (Bungkawn)
C. Muana & Ptr (Tuikhuahtlang) 3-1 Samuel & Ptr (Bungkawn