Oil India Mizoram Hexa League Season I chu hlawhtling taka khelh chhunzawm zel niin a zan 5-na chu Sept ni 10, 2015, Ningani zan khan khelh zawh a ni leh ta. Inkhel hmuhnawm takah hian Rubber hmasa zawkah The Smashers, Vaivakawn leh Mission Veng La Paloma te intumin Mission Veng La Paloma hian 4-1 in Vaivakawn an hneh a. Rubber 2-na ah hian Tuikhuahtlang Table Tennis Club ten Bungkawn Games & Sports Association 4-1 vekin an hneh ve bawk. Player's of the night-ah Ramduhsanga Mission Veng La Paloma chu thlan a ni.
Inkhel Bihchianna
The Smashers, Vaivakawn vs Mission Veng La Paloma
Rubber hmasa zawkah hian vawi 2 khelh tawha la chak vek The Smashers, Vaivakawn leh vawi 2 tho khel tawha la chak zo lo Mission Veng La Paloma te an inkhel. Thumvawrah Vaivakawn chak zawkin zan hmasa lama Player’s of the Night C. Vanlalruata chu no 1 ah rawn dahin amah bitum tur hian Mission Veng in Henry Laltanpuia an rawn dah. Inkhel hmuhnawm leh inhnehtawk takah hian Henry-a, Mission Veng 3-2 in a chak. Henry-a hian an team match 3-na ah hian a game dik tak rawn lantirin, a vuak nat leh consistency a rawn dinchanpui a ni.
Second singles ah hian Mission vengin an regular no 1 Ramduhsanga rawn chhuahtir lehin amah bitum tur hian Vaivakawn chopper tha leh an inghahna B Lalruatpuia an rawn luhtir ve thung a. Ruatpuia hian match hmasa lama a game tha rawn ang rawn lanchhuahtir thei lovin Sangtea hian 3-0 in hnehna a chang leh.
Doubles khelh leh niin Mission Veng hian 2-0 in hma an hruai. Vaivakawn tan chakloh a thiang tawh lo. Team pahnih te hian doubles a la inlan lo player pakhat ve ve rawn enchhin in Vaivakawn lamah hian Albert LC Tluanga leh Lalhmingmawia inkawpin Mission Veng tan Henry Laltanpuia leh Khamlianthanga an rawn inkawp. Match boruak sang tak hnuaiah hian khel tha zawk Mission Vengin 3-1 in hnehna an chang.
Match 3 khelh zawh takah Mission Veng in 3-0 in hnehna an chang der tawh. Match 5 khelh zawh ngei ngei tur anih vang leh Match won, game difference ten he MHL ah hian kawngro nasa taka a la sut dawn avangin Vaivakawn lam pawh hnual mai lovin third singles ah chak ngei tumin Lalchhanhima arena-ah an rawn luhtir. Mission Vengin Lalchhanhima dahtha thei tura an ngaih zan hmasa lama khel tha B. Vanlalmuanpuia rawn luhtir ve lehin Chhanhima hian a game style danglam tak, backhand jab leh a counter game that chhawrin 3-0 in B. Muana lakah hian hnehna a chang.
Reverse singles-ah hian team pahnih te no 1 C. Vanlalruata, Vaivakawn leh Ramduhsanga, Mission Veng te inkhelin a forehand leh backhand accuracy that chhawrin Sangtea, Mission Veng hian 3-1 in hnehna a chang.