12 Jan 2019 09:03

inkhel

​OGS-a tan fiahna tak tak

Naktuk Sunday zan (13/1/19) hian Manchester United chuan Wembley Stadium-ah Tottenham an luhkhung dawn a, interim manager Ole Gunnar Solskjaer-a hnuaiah United chuan fiahna tak tak an hmachhawn dawn.

United hian nikum kum tawp khan manager Jose Mourinho an ban a, an striker hlui Solskjaer chu an manager ni turin tun season chhung atan an ruai lailawk. Solskjaer-a hnuaiah beisei aiin an che tha a tih theiha, game nga khel tawhin hnehna an la chang veka, goal thun an awlsam hle. Mahse United hian heng match pangaah-te hian fiahna tak tak an la hmachhawn lo a tih theih a; Premier League-ah Cardiff City, Huddersfield, Bournemouth leh Newcastle-te hmachhawn tawhin, FA Cup-ah Reading an hmachhawn tawh bawka, game ngaah hian goal 16 lai an khunga goal thum an chhuah tawh bawk.

Interim manager hnuaiah United player thenkhat ten siamthar lehna an chang tih theihin, a bikin Marcus Rashford leh Paul Pogba-te an khel tha thin hle. Table-a pathumnaa awm mek Tottenham lakah United hi an manager hovin fiah an ni dawn a, an game hnuhnung panga anga an khel thei a nih chuan an lakah beiseina a sang zual dawn hle.

United hian khelh 21-ah point 38 neiin paruknaah an awm mek a, English team tha zual paruk zingah an hniam bera, paruknaah an awm. An chung chiaha awm Arsenal chu point thuma pha lovin, pathumnaah awm Tottenham chu point 10 in an pha lo bawk. Tottenham hian khelh 21-ah point 48 nei tawhin, pathumnaah an awm mek. Tun season tan hma nipui bazar lai khan Tottenham chuan player lakluh nei lo mahse beisei phak bakin an che tha a, Manchester City lehpelin, pahnihnaah hial te an awm chho hman.

Mual neitu lam Tottenham tan Brazilian winger Lucas Moura a khel thei dawn em tih a la hriat lova, Eric Dier leh Victor Wanyama-te chu inhliam avangin khel thei lo turah ngaih an ni a, Jan Vertonghen leh Mousa Dembele-te chuan training zawm leh tawh mahse an la inkhelh theih a rinawm loh. United tan Pogba chu a inkhel leh thei tawha, he game pawimawh takah hian inkhel bul a tan ngei pawh a rinawm hle. Marcos Rojo chu duh anga a hliam a dam chak loh avangin a ram Argentina lamah thawn haw rih a ni a, Chris Smalling chu inhliam avangin a khel thei lo maithei a, Eric Bailly chu Bournemouth laka red card a hmuh avangin hrem la niin, match thum hrem a nih chu Spurs lakah a tlingtla chiah ang.

Solskjaer hian Tottenham lakah United hi a chakpui thei a nih chuan, United manager lo awm tawh zawng zawng zinga a game hmasaber paruka hnehna chang vek thei awmchhun a ni dawn. United hi tun hnaia Spurs an tum hnuhnung pahnihah an tlawm ve ve a, Spurs hi an chak leh a nih chuan kum 1960 hnuah inelna sanga United a zawna vawithum an hneh leh hmasak ber tum a ni bawk ang.

United hian Premier League-a away-a Spurs an tum hnuhnun pathumah an la tlawm vek a Solskjaer chuan team lian zawk an nihna chu phochhuak leh ngei a tum dawn. Solskjaer chuan Premier League game a nih phawt chuan fiahna a nih vek thu sawiin Spurs erawh fiahna lian ber an tan a nih dawn thu a sawi.

Norwegian manager chuan, “Premier League-ah chuan game tinah fiah kan ni a, mahse Spurs erawh kan tan fiahna lian ber an ni dawn chiang hle. Anmahni hnaiha, lehpelh kan duh bawk chuan tha taka kan khelh a ngai dawn a, result tha tak kan neih a ngai.

“Kan tumte a zirin kan insiamrem a ngai a, league-a team tha ber pakhat kan hmachhawn dawn. An chakna lai kan hriat a ngai dawn a, mahse keini pawhin kan nawr ve a ngai. Chu chu kan chakna a ni a, team anga lehlam nawr hi kan chakna a ni tih chu kan khelh tawh dan atangin a lang a ni,” a ti.

Tun season chawhma lam khan Old Trafford-ah team hnihte hi an lo inhmachhawn tawha, Tottenham hi si thum faiin an chak. Tunah erawh Spurs-in home-a an hman lailawk Wembley-ah an khel dawn a, inkhel hmuhnawm tak team hnihten min hlui a beiseiawm a, zan dar 10-ah an inkhel ang.