Odisha FC chuan Kerala Blasters atangin Mizo midfielder Samuel Lalmuanpuia chu an la lut a, kum hnih chhung atan contract an ziahpui.

Samuel Lalmuanpuia hian Shillong Lajong atangin bul a tan a, Minerva Punjab leh Kerala Blasters ah te a khel bawk a. Indian Super League season 6-na tan leh hmain Blasters hi a zawm a, tunah chuan Odisha FC hi a zawm ve leh ta a ni.

I-League club Shillong Lajong-ah season 4 chhung chu Samuel Lalmuanpuia hi a awm hman a, 2015 atanga 2018 chhung khan an club player pawimawh tak niin, match 59 khelhah goal 10 a thun bakah, mi goal thun tur vawi 6 a siamsak bawk a ni.

2018-19 season-ah khan Minerva Punjab chuan loan-in an la a, hetah hian game 6 khelhah goal 1 chu a thun a. Punjab tana a game khelhte hi AFC Cup lamah vek niin, 2017-18 season chhung khan a chet that em avangin Samuel Lalmuanpuia hi I-League U-22 Player of the Year award an hlan a ni.

2019-20 ISL season-ah khan khelhna hmun a chang thei lo hle a, vawi 5 chiah a inlan ve a, chu pawh substitute bench atang vekin a ni nghe nghe a. Khelmual chhunga a chet hun chhung hi a vaia belh khawmin minute 59 chauh niin, goal a thun loh bakah mi goal thun tur pawh a siamsak ta lo a ni.

Eelco Schattorie chuan kum 21-a upa Samuel Lalmuanpuia chu India ram chhunga player tha ber pawl niin tun hnaiah a sawi a, chutih rualin a pian velah duhthu sam lohna a la awm thu sawiin, nakinah chuan ISL vela langsar berte zinga mi a nih a rin thu a sawi a ni.