21 Nov 2020 04:25

inkhel

Octagon chhunga kir ka tum lem lo: Khabib

Khabib Nurmagomedov chuan chawlh a puan hnuah octagon chhunga kir leh tumna a neih lem loh thu a sawi.

Kumin October thlaah khan Abu Dhabi khawpuiah Khabib Nurmagomedov chuan Justin Gaethje a hneh a, an insual zawhah hian MMA huang atanga a chawlh thu a puang zui nghal a. Russian fighter hian kumin July thlaa a pain a thihsan vanga hetianga chawlh zui mai tum ta hi a nih thu a sawi chhuak a ni.

UFC president Dana White chuan tun hnaiah Khabib chu octagon chhunga a kir leh mai a rin thu a sawi chhuak leh thin a. Chawlh puang tawh mah se Khabib chu insual tura vawi khat tal a kir leh ngei a rin thu sawiin, inchawi pawh a cho thu a sawi nghe nghe a ni.

Dana White chuan, “Khabib hi octagon chhungah a rawn kir leh ngei hi ka ring tlat a. Inchawi nuam ti chi ka ni a, Khabib chungchangah pawh hian inchawi ka cho a, kan inchawi dawn a nih chuan insual tura a rawn kir leh ring chungin ka pawisa ka thap ang,” a ti.

Lightweight lalpa an tih mai Khabib chuan octagon chhungah a tan hmachhawn tur an awm tawh loh thu sawiin, kir leh pawh awmzia a awm loh thu a sawi chhuak.

Nurmagomedov chuan, “Ka kir dawn leh dawn loh chungchangah hian thu thang a tam em em mai a, hei hi chu nakinah pawh a la awm zui zel dawn chiang a ni,” a ti.

“Dana White leh promoter dangte pawhin kir leh tur hian min duh a, insual leh tur hian min duh em em mai a. A nihna takah chuan hetianga kir leh tura min duh chhan chu pawisa vang a ni mai a. Kir tura rilru ka siam hma chuan min um zui zel dawn tih ka hria,” a ti bawk.

A sawi zelnaah, “Vawi khat kan han insual a, mipui lam chuan a leh peka mi tur an lo ngaihven nghal der zel a. Vawi khat insual leh ta ila, a leh peka ka insualpui tur an ngaihtuah leh nghal ngei dawn a. Vawi khat tih tawh chuan thawnthu tawp thei lo a rawn awm zel mai a ni,” a ti.

“He infiamna huanga awm zui zel hi ka tan a tangkaina ka hre tawh lo a, insual zui zel tumna hi ka nei tawh lem lo. Pawisa hlawh chhuah duh pawh ni ila hmun dangah hlawh dan kawng ka dap ve tawh mai ang,” tiin Khabib Nurmagomedov chuan a sawi a ni.