Paige VanZant chuan nunna atana hlauhawm thei tura Octagon chhunga inbeih aiin Instagram lama thlalak dah chu a tan a hlawk zawk daih niin a sawi.
UFC fighter Paige VanZant hian mixed martial arts huang chhungah mipa leh hmeichhe dinhmun a inthlau lutuk chu a vei thu sawiin, thuneitute chu mipa leh hmeichhe hlawh an pek dan inthlau lutuk vangin a sawisel nasa hle.
Kum 25-a upa VanZant chuan hmeichhe fighter te tana pawisa tawktarh a tlem lutuk chu a ning a, a contract a hman zawhah a hlutna hre chiang thei lehzual turin free agent a ni zui a ni.
VanZant hian Instagram lamah chuan follower a ngah chho sawt hle a, tun dinhmunah hian follower hi 2.2 million vel zet chu a nei tawh a. MMA huang chhungah vawi 12 fight a nei tawh a, heng zinga 8 ah hian a chak a. UFC ah vawi hnih chu main event a chang ve tawh niin a sawi chhuak.
American fighter VanZant chuan, “Octagon chhungah theihtawp kan chhuah a, nunna atana hlauhawm khawp thil thleng thei karah hun kan hmang a, kan pawisa hlawh lah chu chuti takin a tam lo zui a. Chutiang ai chuan mahni in chhungah hahdam takin kan awm a, Instagram-ah thlalak ka post a, heti ringawt hian pawisa ka hlawh hnem zawk daih,” a ti.
“Contract chungchanga kan indawr hnuhnun ber tuma min sawipui chu hmeichhe champion aia hlawh sang min pek an theih loh thu a ni a. Eng vangin nge hmeichhe dang nen chauh min khaikhin? Fighter te hi a hmei a pain kan hlawh chu a intluk tlang turah ka ngai,” a ti bawk.
A sawi zelnaah, “Dik taka sawi chuan hmeichhe fighter te sum lak luh hi a beitham em em a, hlawh tihsan hi ka phut tak meuh a ni,” a ti.
Paige VanZant chuan, “UFC huang chhung leh pawn lamah pawh ka tha tawh viau mai a. UFC bikah phei chuan vawi 5 ka chak a, main event vawi hnih ka chang tawh bawk a. Hetiang record nei hi chu sum lampangah pawh duhsak phu tak chu an ni ve chiang a ni,” a ti.
VanZant hi a fight hnuhnung pathumah vawi hnih a chak lo a, kumin kum tir lamah khan a ban ruh a tliah avangin a hmel hmuh tur a awm zui vak rih lo a. A bialpa, MMA fighter Austin Vanderford nen YouTube channel an siam a, helam hi a buaipui chho ta rih a ni.