Cristiano Ronaldo-a'n Manchester United a zawm tirh khan Jersey Number 28 hak a dil, mahse Sir Alex Ferguson chuan Ronaldo chu number 7 ha turin a lo ti a. Khami tum khan number 7 hak kha tih tak tein a tih thu Ronaldo chuan a sawi chhuak.
2003 khan Sporting Lisbon atangin Manchester United chuan £12.2million in Ronaldo an lei a nih kha. Real Madrid lamah Beckham a kal tak avangin United number 7 a awl a, chu chu Alex Ferguson chuan Ronaldo a hak tir ta a ni.
"United-a ka luh tirh khan kan coach hnenah number 28 hak ka dil, mahse number 7 ha turin min lo ti.
"Beckham ka hriat chian avang khan a number chhawm kha ka tih/hlau tak zet a. Mahse chona lian tak hmachhawn chu ka tum ta a. Tun thleng hian he number hi ka lucky number a ni chho ta. He number hmang hian footbal-a hlawhchhuah tur ang chu ka hlawhchhuak ta hlawm bawk a ni," tiin Ronaldo chuan a sawi.
2009 khan Ronaldo chuan Real Madrid a zawm a, Raul-a'n number 7 a hak avangin number 7 a chang lo. Mahse Raul-a chhuah hnuah tun thlengin Real Madrid number 7 chu Ronaldo ta a ni ta a ni.