England leh Tottenham striker hlui Jermain Defoe chuan hmangaihna a sem zai mek a, ni hnih chhung lekin chhuahpui pahnih a nei.
Kum 41 mi hian kumin kum tir khan a nupui hlui ni ta Donna Tierney a then a, Essex-a an chen dunna inah awm chhunzawmin a luck cher cher hle. Wedding planner Paige Mallabourn-Edmondson a chhuahpui hnu lawkah influencer Alisha LeMay nen hmuh dun an ni a, sapram chanchinbu thenkhat chuan a kawp ve ve niin an sawi.
Paige zawk hi tunhnai khan London-ah a insawn a, Defoe kianga hun hman tam a duh niin a lang. Kum 31 mi LeMay nen hian pathlawi anih hnu lawkah an intawng a, Herfordshire-a a in pakhat zawkah an awmdun fo tih thawm a awm.
Essex leh Herfordshire-a a in neihah hian a kar tawn sek niin Telegraph chuan an ziak a, hmeichhe pahnihte hi an inthik tawn lo bawk niin an sawi. Defoe hian thlan tur zawk a hre lo niin a lang a, a khawsak dan hian khawthlang ram chanchinbumite beng a verh hle.
A nupui hlui Donna nen hian nikum Nikir thla khan an innei a, an inneih senso ringawt pawh £200,000 a tling a ni. A tirah hlim deuh angin lang mahse, thla tam vak lo a liam hnuah an inkar a chhe tan a, Defoe hian Caribbean island-ah chawlh a hman laiin Glasgow-ah Donna a awm thung.
Scottish beautician nena an intawn dan hi a tunlai khawp mai a, social media kaltlanga inhria niin kum khat chuang an in zui a, 'Tiam tlat e' tih hial mahse an hlim rei ta vak chuang lo. Donna hian Instagram-a a post pakhat chu alo 'like' zauh a, Defoe hian be nghalin an in zui chho a, 2021 Pawlkut thla khan a vawi khat nan an in hmu.
2019-a Rangers a zawm khan Glasgow-ah Donna a cheng tih a hria a, inbe reng mahse hmaichhanah an in hmu lawk lo. An inneihnaah hian Tottenham first team coach Ledley King, West Ham United striker hlui Carlton Cole leh Manchester City winger ni thin Shaun Wright-Phillips-te pawh an tel a, Cliveden House-ah niin an hlim tlang hle.
An inneih atanga thla khat vel lekah Defoe a lerh kual a, len khawthawn puiah nurse pakhat a sawm niin an sawi. Instagram-ah pawh biak a ngah hle niin The Sun chuan an ziak a, an inneih niah Donna tan a rinawm reng dawn tih OK! magazine hnenah sawi mahse a bawhchhe rang hle.
Defoe hian a ex-te pawh a hrut kual niin a lang a, a kawp tawh thin Alexandra Burke pawh a hmu leh niin an sawi. Radio presenter Ben Weston leh a nupui hlui Sally inthen chhanah pawh England striker hi an puh ber a, tih dik loh a nei lo tiin a tang tlat thung.
Defoe hian a inkhelh chhungin club pakua a zawm hman a, a hun tam zawk chu Premier League-ah hmangin sulhnu a nei chhe lo. England national team tan pawh vawi 57 fehchhuakin goal 20 a khung a, Lee Bowyer, John Terry, Ashley Cole leh Ledley King-te chherchhuaktu Senrab atanga inzirchhuak ve tho a ni.
Premier League-ah hian game 496 khelin goal 162 a khung a, midang tih goal tur vawi 33 a siamsak bawk. A hun pumah nomawi vawi hnih a chawi a, a hun hnuhnung chu Sunderland-ah hmangin nikum Vau thla khan inkhelh a chawlhsan a ni.