28 Aug 2020 05:08

inkhel

NT Lalbiakkima a rawn haw leh phawt dawn

NT Lalbiakkima chu Seoul khawpuia WBC Asia Title Match a tel turin Korea ramah hian a kal a, tun hnaiah COVID-19 vei an pun chhoh em avangin India ram lamah a rawn kir leh phawt dawn.

Mizo boxer NT Lalbiakkima hi Dongdaemun, Seoul ah a innghat a, September 18 a Korea Boxing Organization in WBC Asia Title Match an buatsaih tur atan a inpuahchah mek a. Hetiang a nih lai hian an awmna hmun velah hian coronavirus vei thar an pung chho nasa a, hei vang hian Korea hi chhuahsan rih a tum phah ta a ni.

Seoul khawpuiah hian COVID-19 vei thar mi 300 vel zet an awm a, hei vang hian lockdown an puan phah a. Lockdown an puan hma hian NT Biakkima chu a chhuak hman hlauh a, thlawhtheihna pangngai a thlawh rih loh avangin special flight hmangin vawiinah hian India ram a rawn pan dawn niin inkhel.com a hrilh.

India ram a rawn luh hnuah hian duh hun hunah Mizoram rawn pan theih a ni lo a, thlawhtheihna rawn thlawh remchan hmasak ber, September 4 ah khian Mizoramah chuan rawn thlawh luh a rilruk a ni.

Korea Boxing Organization buatsaih tur WBC Asia Title Match ah hian NT Lalbiakkima chu light flyweight huanga tel tura ruahman a ni a. A inhnekpui tur hi an tifel mai lo a, a tirah Thailand boxer leh USA boxer an thlang phawt a, heng boxer pahnihte hi an record a tha deuh hlek a, hei vang hian promoter te chuan Biakkima tan an huphurhpui deuh a, China boxer an sawi lang ve leh a ni.

WBC Title Match nei tur hian ruahmanna an siam ve tawh a, chuti chung chuan tunlaia hri leng coronavirus vangin he event hi thulh theih a la ni reng thung a. Engmah sawi chian theih a awm loh avangin Biakkima pawh hi a inbuatsaih chho reng tho a, an inhnek thei ta a nih pawhin tha taka chet theih ngei a tum thu a sawi.

A inbuatsaih dan chungchang zawhna chhangin, “Duh angin experience te ka la nei tha lo a, chu vangin vawi khatnaa professional round 10 han khelh nghal tawp chu a ruk chuan ka huphurh ve deuh a. Round 6 vel chu ni se pawi ka ti lo a, round 10 han inhnek nghal tawp mai kha chu tlem chuan a zuamawm lo ve deuh a ni,” tiin Biakkima hian inkhel.com a hrilh.

“He thil hi chiang deuh reuh, chiang chiah si lo a la ni a, hei vang hian inrin thiam pawh a harsa rih hle a. Sparring partner pawh tunah hian min la pe lo a, chutih rualin ka theih anga thain ka inbuatsaih chho ve mek a. He title match hi kan nei dawn ta a nih pawha inpeih thlap ka duh a ni,” tiin a sawi a ni.