Mizo boxer NT Lalbiakkima chuan Thailand boxer Thani Narinram chu a hneh a, quarter final a lut.

Astana, Kazakhstan a khawvel ram hrang hranga boxer tha rual fuankhawmna President’s Cup Tournament neih mekah Biakkima hian an inhnek tan atangin a ngam zawk viau mai a.

Saiha boxer hian combination hnek chhuak nghal char charin, second 20 na lekah a khingpui chu a hnek tlu nghal a. Thailand boxer chu a rawn ding chhuak leh a, mahse round tinah Biakkima hi a chungnung chho a, a tawpah unanimous decision hmangin Mizo tlangval hi a chak a ni.

Quarter final-ah Lalbiakkima hian world number 1 ni lai mek, Uzbekistan boxer Hasanboy Dusmatov a hmachhawn dawn a. Hasanboy hi 2016 Olympic light flyweight champion niin, 2017 World Championship silver medallist a nih bakah, 2016 leh 2017 Asian champion a ni bawk.

Indian boxer dang, world youth champion hlui Sachin Siwach pawhin a khingpui a hneh a, quarter final hi a lut bawk a. Nikuma Asian Confederation a best youth boxer atana an thlan Sachin hian Kazakhstan boxer O Bayniyazov chu 3-2 in a hneh a ni.

Light heavyweight category-ah Devanshu Jaiswal pawhin Belarus boxer Pavel Brazovskiy a hneh a, quarter final hi a lut ve a. Thomas Meitei Mayengbam, Dinesh Dagar leh India Open gold medallist Sanjeet te chu first round-ah an tla a ni.

6th International Boxing Tournament-ah hian ram hrang hrang 15 atangin infiammi an kal khawm a. Belarus, India, Japan, Kyrgyzstan, Mongolia, China, Philippines, Russia, Sweden, Tajikistan, Thailand, Turkmenistan, USA, Uzbekistan leh Kazakhstan atang tein boxer 170 vel zet an tel a, heng zinga 130 hi mipa niin, 40 chu hmeichhia an ni.

Thailand atangin boxer 17 an tel a, tel hnem ber an ni a, Uzbekistan chuan 16 an tir a, India chu thawn hnem lama pathumna niin boxer 14 an tel a ni.