16 Jul 2019 09:37

inkhel

November 8 ah Amir Khan vs Manny Pacquiao?

Amir Khan duhthusam a thleng thei dawn ta a, kumin November 8 khian Riyadh, Saudi Arabia-ah Manny Pacquiao nen an inhnek dawn niin a sawi.

British boxer Amir Khan chuan hun rei tawh tak atang khan Filipino boxer Manny Pacquiao chu hmachhawn a duh thu a sawi tawh thin a. An pahniha an inhnek theih dan tur pawh a ngaihtuah nasa hle a, a duhthusam erawh a thleng thei lo thing a. Tunah erawh engkim tihfel a ni tawh a, kumin kum tawp lamah an inhnek thei dawn niin Khan hian a sawi a ni.

Kar hmasa lawkah khan Amir Khan hian Billy Dib a hneh a, £7 million vel zet chu a hlawh thei a. Thawhlehnia chanchinthar lakhawmtute a kawmnaah kumin kum tawp lamah Saudi Arabia-ah Pacman nen an inhnek dawn tih hi a sawi chhuak a ni.

Inrinni khan Saudi Arabia-ah Amir Khan hian WBC international welterweight title a la a, title a lak hnu hian a hmachhawn leh duh chu a sawi chhuak nghal a. talkSPORT in an sawi dan chuan Khan leh Pacman te hian contract an ziak ve ve tawh a, tih fel ngai hmasa chu an tifel vek niin an sawi bawk.

Billy Dib nen an inhnek zawh hnu khan Amir chuan, “Manny Pacquiao nen inhnek ngei kan duh a. Saudi Arabia-ah hian a rawn kal ngei kan beisei a, kum tawp lamah helai hmuna kan kir leh hunah Manny Pacquiao pawh a rawn tel theih ngei kan beisei a ni,” a ti.

Manny Pacquiao chuan tun kar tawpah hian Keith Thurman a hmachhawn dawn a, WBA super welterweight title inchuhin an inhnek dawn a. Kum 40-a upa Pacman tan chuan professional fight 71-na a ni dawn a, kumin kum tawpah vawi 72-na chu a thleng zui thei bawk a ni.