22 Oct 2015 02:07

PC Lala

inkhel correspondent and photographer

November ni 11-ah Samsung 3:16 LPS Pro Fight tan a ni dawn

October 21, 2015 (Nilaini) khanah Organising Committee thukhawmin Samsung 3:16 LPS Pro Fight tan hun leh neihna tur chungchangah thutlukna a siam fel.  November 11 atangin Mizorama sports stadium lian ber Rajiv Gandhi Multipurpose Hall, Mualpuiah Pro Fight vawi ngana tan a ni ang.

* October 23, zirtawpni atangin LPS Office-ah tel tum tan form lak chhuah theih a ni a, pakhat lak nan Rs 10 zel sen a ngai.

* Pro Fight-a tel tum form la chhuakten November 9 thlengin theh luh theih a ni a, November 9-ah Hawla Indoor Stadium, Republic Vengthlangah inbuk a ni dawn a, he tah hian form theh luh nghal theih a ni.

* Nikum ang bawkin weight then hrang pangaah a duh apiangin title an chuh thei ang.

* Samsung 3:16 Plan Solution chuan Pro Fight vawi ngana sponsorship a lei fai vek a, championship hming atan Samsung 3:16 LPS Pro Fight tih a ni.

* Organising Committee-in a hun leh hmun chungchangah rang taka thutlukna a siam mai theih loh avangin pawi a ti hle.

* Kum dangah mipuiin an hlut thin avangin hmunhmain a zo lo fo va, kuminah Mizorama infiamna stadium lian ber Rajiv Gandhi Multipurpose Hall-ah neih theih a beisei.

* He hall lian tha tak leh Mizoram tana rotling tura buatsaih mek hi official-a hawn a la neih loh avangin awlsam taka thil tihfel mai theih a ni lo.

* Mahse, chief minister Pu Lal Thanhawla leh sports minister Pu Zodintluangaten Mizoram boxing-in hma a sawn theih nan leh thalaite mamawh hriatthiampuiin hall hman an phalsak a, an chungah organising committee a lawm tak zet a, a tul anga hmalakpuitu Mizoram State Sports Council secretary Pu C Laltlanthanga chunga a lawm hle bawk.

* 2009-ah Pro Fight neih tan a ni a, a vawi khatna atangin a hlawhtling em em a, nikum khan kum thum hnuah thar thawh lehin a buatsaihtute rin phak bakin mipuiin an hlut.

* Weight then hrang pangaah lightheavy champion Abel Lalawmawia chiahin title a humhim a, lightfly-ah a vawi khat nan Lalbiakkima a champion a, bantam leh light-ah Lalnunhlua leh Lalmuanpuiaten an hloh tawh kawnghren la kirin middle-ah a vawi khat nan Johnkenty Vanhlimpuia a champion bawk.

* Pro Fight urlawk nan Mizoram Boxing Association buatsaih district hrang hranga training centre-ten inelna an nei dawn a, LPS Vision-in inhnek zawng zawng live-in a pe chhuak ang.

* Mizoram Boxing chuan awmze nei zawka hmasawnna a awm theih nan kuminah district hrang pariatah training centre a hawng. Aizawl bikah pathum awmin hmun dang zawngah centre pakhat zel a awm a, thla thum chuang mumal taka kalpui tawh niin November 3-6 chhungin Ramhlun Sports Coimplex, Boxing Hall-ah an inel dawn a ni.