10 Sep 2018 06:41

inkhel

Novak hian Federer a khum thei ang: Del Potro

Juan Martin del Potro chuan US Open final-a a hneh loh Novak Djokovic chu Roger Federer thei tura a rin thu a sawi.

Pathiannia US Open mipa singles final-ah Djokovic chuan 6-3, 7-6 (7/4), 6-3 in Del Potro hi a hneh a, Grand Slam title 14 a la tling ta chiah a, Pete Sampras nen an innihrual chiah a ni.

Kum 31-a upa Serb hi Rafael Nadal aiin title 3 chauhin a hniam tawh a, Roger Federer tluk pha tur chuan Grand Slam title hi paruk a lak belh a la ngai dawn a. Del Potro chuan Djokovic-a tan Grand Slam title paruk lak belh chu thil harsa a nih a rin loh thu sawiin, Federer chu a lehpelh theih ngei a rin thu a sawi a ni.

Del Potro chuan, “Djokovic hian Grand Slam title 14 chu a nei ta der mai a, kum khatah Grand Slam title pahnih a la thei a. A hrisel tha a, tan a lak chhunzawm reng bawk a, Roger Federer lehpel thei tur hian beisei a sang viau a ni,” a ti a.

“Roger Federer leh Rafael Nadal te pawh hian Grand Slam title lak tumin theihtawp an la chhuah zel a rinawm a, chanchin thar siam thei tura an bei hi en a nuam a. Anni hi la awm zel se duhthusam a ni,” a ti bawk.

A sawi zelnaah, “Tu te pawhin kan theih leh kan phak tawkah thahnem kan ngai tlang hlawm hle a, Novak hi chuan record thar siam thei turin engkim a nei vek a ni,” a ti.

Del Potro hian kum 20 mi a nih laia 2009 US Open title a lak bak kha chu Grand Slam final a lut leh ta miah lo a, tun tum hi khami hnua Grand Slam final a luh leh hmasak ber a ni a. 2009 US Open champion ni thei turin Rafael Nadal leh Roger Federer te a hneh a ni.

A champion hnu hian a banrek na vangin duh angin a inkhel tam thei lo a, vawi li ngawt mai zai a ngai nghe nghe a. 2015 tawp lam khan a ranking pawh 581 daih mai a ni a, a rilru a hah hle a, Grand Slam event 10 zet maiah a tel thei lo a, tennis chawlhsan a tum phah ut ut nghe nghe a ni.

Tunah chuan a rawn ziaawm ve leh tawh a, World No. 1 player vawi 10 a hneh tawh a, a chungnung ber ni pha chuang lo chunga pakhatna dinhmun luahtu hneh hnem thei ber a ni a. Kumin Indian Wells Masters final-ah Roger Federer a lo hneh tawh a ni.

A tawn san ber World No. 3 dinhmun a luah mek a, Del Potro chuan player ropui tak tak Djokovic, Federer leh Nadal te hun laia a khel thei chu lawmawm a tih thu a sawi a. Anni pathum hian title lak ti harsa viau mahse miropui tak tak bula a khel thei chu duhthusam a nih thu a sawi.

Kum 29-a upa Del Potro chuan, “Novak, Roger leh Rafa te atang hian ka inzir thar reng a, anmahni pathum vanga Grand Slam title ka la thei thin lo hi pawi ka ti lo reng reng a. Anni ang miropui te hunlaia ka khel ve thei hi lawmawm ka ti em em a ni,” a ti.

US Open final thleng thei tur hian defending champion leh World No. 1 Nadal a paltlang a. Mahse, Djokovic lakah hian 4-14 record a nei mek a, US Open bikah hian 2007 leh 2012 te khan Djokovic hi a lo hneh lo tawh bawk a ni.

“Thiante ngei maiin trophy an han keng hi chu hmuh a nuam a. Novak a champion hi ka lawmpui tak meuh a ni,” tiin Del Potro chuan a sawi.