Novak Djokovic chuan Wimbledon semi final a lut a, Pete Sampras-a record chelh lai a nihrual chiah bawk.

Serbian star Novak Djokovic hi Japanese pa Kei Nishikori nen an inkhel a, darkar 2 leh minute 35 chhung an inkhel a, Djokovic hi 6-3, 3-6, 6-2, 6-2 in a chak a, semi final-ah hian Rafael Nadal emaw, Milos Raonic emaw a hmachhawn ang.

Djokovic hi Wimbledon-ah vawi 63 a chak tling ta a, Pete Sampras a nihrual ta chiah a ni.

Novak Djokovic chuan, “Grand Slam semi final thlen theih hi chu a lawmawm duh a, tun hnaiah theihtawp chhuahin ka inbuatsaih bawk a, hma ka sawn viau chuan ka hria,” a ti.

“Ka khelh apiang hian ka ziaawm chho zelin ka hre mai a, tunlai tak phei hi chuan keimah rau rauah ka that ve ber lai niin ka hria a. Semi final hi a hma pawhin ka lo thleng ve tawh thin a, tu pawh hmachhawn dawn ila ka huphurh hran lo a. Ka khelh leh tur ka thlir zui tawh ang,” a ti bawk.

A sawi zelnaah, “Hetiang dinhmun thleng thei tur hian rim takin ka inpuahchah a, tournament lian thama che chhe lo turin theihtawp ka chhuah a, Wimbledon aia ropui hi a awm bik lo a. Title lak theih ngei ka duh a, ka inthlahdah dawn hauh lo a ni,” tiin a sawi.