Norway-ah Lallianzuala Chhangte a kal maithei

17th January 2019, 10:01PM

Lallianzuala Chhangte chuan ram pawnah a thiamna a pho chhuak thei dawn hnai a, a khelhna club Delhi Dynamos in an remti a nih chuan Norwegian club Viking FK ah ni 10 chhung trial a nei thei dawn a. Delhi Dynamos hian Lallianzuala hi trial neih an remtihsak dawn nge dawn lo an la sawi theih loh thu an puang.

Mizo tlangval Lallianzuala Chhangte hi Indian Super League club Delhi Dynamos ah a khel mek a, Norway club Viking FK chuan January thla chhungin an club-a trial nei turin Lallianzuala hi an beisei a. Hetianga trial a neih theihna tur hian Krish Roy, Director, Business Development & International Relations, German Football Academy (GFA) chuan theihtawp a chhuah a, TSC Asia, New Delhi nen an tang kawp a ni.

India ram football ngainatute tan chuan hetianga ram dang club-in ram chhung footballer an rawn ngaihven hi hil lawmawm tak mai a ni a. India coach kal chhuak ta Stephen Constantine khan Asian Cup khel tur zingah Lallianzuala Chhangte hi a koh tel tak loh avangin mi tam tak chu an thinrim hle a, tuna hetiang chanchin a awm takah chuan an thinrimna pawh a ziaawm phah hle a rinawm.

Viking FK hian left winger Lallianzuala Chhangte hi trial nei tura an duh laiin, a khelh mekna Delhi Dynamos chuan an player hi Norway lama kaltir an remtih dawn leh dawn loh an la sawi chian loh thu an puang a ni.

Delhi Dynamos chuan thuchhuah siamin, “Tun hnaiah Delhi Dynamos winger Lallianzuala Chhangte chu Viking FK a trial nei turin January thla tawp lamah hian Norway lamah a kal dawn niin an sawi hlawm a. Club chuan kan player te rawn beiseitu an awm ve fo a ni tih kan sawi duh a, tun hnaiah Viking FK pawh hian Lallianzuala hi an rawn beisei ve mek bawk a ni,” tiin an tarlang a.

“Club chuan thil awm dan te ngun takin a ngaihtuah mek a, Norway first division club thil rawn beisei ang te hi kan sawiho ang a, tun atanga hun rei vak loah chuan thutlukna kan siam hman tawh tura ngaih a ni a. Delhi Dynamos chuan club thatna ngaihtuah chungin kan player te tana tha ber tur nia kan ngaih angin thil kan kalpui zel ang tih kan sawi duh a ni,” an ti bawk.

Viking FK hi Norway division sang ber Eliteserien-ah an tel mek a, Stavengar khaw club hi league champion vawi 8 lai an ni tawh a, an champion hnuhnun ber chu 1991 khan a ni. 2017 season tawpah khan Viking FK hi division hniam lamah an tla a, nikum November thla khan first division-ah hian an kai leh chiah a ni.

Tuna an coach Barne Berntsen chuan season thar an tan leh hma ngeiin an team chu thuam that hman vek a duh a. Delhi Dynamos in an remti a nih chuan Lallianzuala Chhangte hian Berntsen leh a coaching staff te hmaah trial hi a nei ang a, an mit a tlung a nih chuan contract a ziak zui thei dawn a ni.

Lallianzuala Chhangte hian 2014 khan DSK Shivajians Liverpool International Football Academy a zawm tan a, 2014-15 I-League U19 season kha a khel a. December 25, 2015 khan India tana a game hmasa ber a khel a, 2015 SAFF Championship a Sri Lanka leh India inkhelh khan minute 77-naah Robin Singh a thlak a ni.

Sri Lanka nen an inkhelh hnu hian Nepal nen inkhelh lehin hetah hian Lallianzuala hian goal hnih a thun a, India chu 4-1 in a chakpui a, India national team tana goal thun thei naupang ber dawttu a ni a. 2016 khan NorthEast United ah khelin, 2017 atang khan Delhi Dynamos ah a khel chho leh a ni.

Copyright © inkhel.com 2024. All rights reserved.