Sunday zan Premier League inkhelah North London derby kan hmu a, Tottenham chuan Tottenham Hotspur Stadium-ah Arsenal lo mikhuala, Tottenham hi 2-1 in an chak.

He inkhelah hian Arsenal chu Alexandre Lacazette-a’n hma hruaipui zet mahse, Tottenham hian hian Heung-min Son leh Toby Alderweireld-te goal hmangin Arsenal hi an lehthala, point 3 pawimawh tak an hlawhchhuak.

Khelh 35-ah Tottenham hian point 52 hlawhchhuak tawhin, 8-naah an awma, Arsenal hian khelh 35-ah point 50 hlawhchhuak tawhin 9-naah an awm mek ve bawk.

Inkhel tan atanga 16mins khelh a nihin, Arsenal hian hma an hruaia, yard 25 vela hla atangin Lacazette chuan kawh takin goal-ah ball a pet lut. Arsenal hian hma an hruai rei lo hle a, Sead Kolasinac leh David Luiz-te inman loh chhawr tangkaiin Tottenham hian Son-a goal hmangin second 137 hnuah an si phurh an sut leh nghal.

First half a hmuhnawm hle a, team hnihte hi an inngamin, an innawr tawn viaua, Tottenham hi chance nei tha zawk an tih theih a, darkar chanve chuang hret khelh a nihin hma an hruai teuh hle a, yard 30 vela hla atangin Welsh fullback Ben Davies chuan cross bar a pet per.

Second half-ah Arsenal hian inkhel an thunun zawk a, darkar khat khelh a nih hma hretin Arsenal hian chance tha zet an neia, Lacazette-a pass chu Arsenal captain Aubameyang chuan cross bar a pet per dawt.

Arsenal hian second half bul tan tha zawk mahse, an inkhelh rei hnuah Tottenham an tlo zawk niin a langa, an rawn hlauhawm chho hle a, hun tawp hnaih lamah goal an khung nghe nghe. 80mins chuang hret khelh a nihin, corner atanga ball vawrh luh chu Belgian defender Alderweireld chuan goal-ah a lo tauh luta, Spurs chakna goal a khung.

Hemi hnu lawk hian Kane chuan chance nei ve leh nghal mahse a shot chu Gunners goalkeeper Martinez chuan a lo save-a, goal luh belh tawh lovin, Tottenham hian 2-1 in hnehna an chang ta a ni.

Tottenham 2-1 Arsenal

(Son 19’, Alderweireld 81’) (Lacazette 16’)

Player Ratings

TOTTENHAM: Lloris 7, Aurier 7, Alderweireld 8, Sanchez 7, Davies 7, Sissoko 7, Winks 7, Lo Celso 6, Son 8, Kane 6, Moura 7. Subs: Bergwijn n/a, Skipp n/a, Lamela n/a.

ARSENAL: Martinez 8, Mustafi 6, Luiz 6, Kolasinac 6, Bellerin 7, Ceballos 8, Xhaka 8, Tierney 7, Pepe 6, Lacazette 8, Aubameyang 7. Subs: Saka 6, Soares n/a, Nelson n/a, Willock n/a.